Уште еден голем успех за членовите на Кик бокс клубот Гладијатор од Неготино со освојувањето на 2 златни и 1 сребрен медал на Балканскиот шампионат во кик бокс кој изминатиот викенд се одржа во Краљево, Србија. Тоа беше повод во кабинетот да ги примам и да им честитам на постигнатиот успех на Јадранка Темелкова која во јуниорска конкуренција  до 55 кг освои златен медал, Роберт Костовски во сениорска конкуренција во категоријата лоу кик до 67 кг освои златен медал и Марија Јанева која во конкуренција кик лајт за сениорки до 55 кг освои сребрен медал, а заедно со нив беше и нивниот тренер Ѓорѓи Вучков. Тој во име на неготинскиот кик бокс клуб Гладијатор се заблагодари на помошта што клубот ја добива од општината и одличната соработка, а јас им ветив дека како и досега, и во иднина ќе ја имаат мојата и поддршката на локалната самоуправа во рамките на расположливите финансиски средства.

 

   Во четврток на 23-ти овој месец во салата за состаноци на општина Неготино со почеток од 19,00 часот ќе се одржи трибина на тема „Безбедноста на сите учесници во сообраќајот на територијата на општина Неготино“. Предвидено е на трибината стручни обраќања да имаат претставници на Секторот за сообраќај при ОВР Неготино. Целта на одржувањето на оваа трибина, но и на наредните кои е предвидено да се одржуваат во иднина, е подигнување на јавната свест и одговорноста за важноста и безбедноста во сообраќајот, проблемите со непрописното паркирање и изнаоѓање начини за надминување на состојбвта, оставањето на возилата на несоодветни места и зафаќање на сообраќајни и јавни површини, движењето на пешаците и нивната безбедност, како и движењето на велосипедите и моторциклите и нивната безбедност. На трибината можат да присуствуваат сите заинтересирани граѓани на кои ќе им се овозможи со презентација на свои размислувања, идеи и предлози да придонесат за подобрување на безбедноста на учесниците во сообраќајот.

  Врз основа на објавениот јавен повик за субвенционирање на набавка на велосипеди и електрични тротинети за граѓаните на Општина Неготино во 2022 година кој беше објавен на почетокот на месец мај, 53 граѓани на општината го остварија правото за добивање на финансиска поддршка од буџетот на општината. Овој проект на општината се реализира веќе неколку година по ред, при што во изминатите 4 години општината субвенционираше набавка на околу 250 велосипеди со што значително придонесе за поттикнување на рекреативниот велосипедизам и зачувувањето на животната околина во општината. Како резултат на големиот интерес од страна на граѓаните, Општина Неготино планира продолжувања на ваквата пракса и во наредните години.

  По „Галеријата на виното“ и „Винската архива“, Неготино доби и „Куќа на виното“ за семејни винарии од општината сместена во просториите на Туристичкиот информативенцентар „Желкова куќа“-објект кој ќе служи за промоција, дегустација и продажба на квалитетните неготински вина. Имено, општина Неготино во соработка со семејните винарии го реализираше проектот „Развој на вински туризам“ преку кој обезбедивме патокази за секоја семејна винарија, изработен е и поставен билборд на автопатот со цел за привлекување потенцијални посетители и обезбеден е простор во „Желковата куќа“ за промоција на производите од семејните винарии. „Куќата на виното“ е со површина од 20м2, опремувањето го реализираа сопствениците на винариите, а истата за посетители ќе биде отворена секој работен ден од 9 до 15ч. На сите претставници на семејни винарии им посакав успешна работа на „Куќата на виното“, квалитетна промоција и продажба на нивните производи и зголемување на бројот на потенцијални туристи во општина Неготино.