Започна асфалтирањето на дел од улицата „Маршал Тито“ која се санира во должина од 800 метри и тоа од потегот од раскрсницата со ул„Никола Петров“ до раскрсницата со ул„29 Ноември“ по целата ширина на коловозот од 7 метри. Се информираат граѓаните на општина Неготино, но и од соседните општини кои со возила поминуваат по оваа улица, дека во понеделник и вторник 17 и 18 септември во времето од 08,30 до 17,00 часот улицата „Маршал Тито“ од раскрсницата кај маркетот „Дијана“ до Полициската станица Неготино ќе биде затворена за сообраќај. Се апелира до моторизираните граѓани во овие два денови да не се движат по главната улица, туку да ги користат другите улици кои им се на располагање. Асфалтерските работи на терен ги изведува „Градба промет“ од Неготино.

  Шестдневна забава исполнета со музички доживувања за сите вкусови и саемска манифестација  нуди општина Неготино во периодот од  18-ти (вторник) до 23-ти овој месец (недела) кога врпочем и завршува традиционалниот Неготински панаѓур. Според програмата, активностите започнуваат во вторник со одржување на настанот „Неготински серенади“ кој ќе се одржи во кино-салата на Центарот за култура „Ацо Ѓорчев“ со почеток од 19,00 ч, продолжува во среда со одржувањето на „Неготинска музичка вечер“ на старата градска чаршија со настап на босанската музичка sвезда Амар Гиле, Бени Шаќири и Нон-стоп и  ДЈ Cosmo Z, а меѓу настаните секако е и традиционалната „Манастирска вечер“ која се одржува во четврток на 20-ти овој месец. Деновите од 21 до 23 септември се предвидени за одржување на стопанско-туристичката манифестација „Неготински панаѓур“- најголема и најмасовно посетена во цела држава, со настап на голем број естрадни музички имиња ангажирани од сопствениците на угостителските објекти.

   Општина Неготино започна со градежни активности за набавка и монтажа на нова урбана опрема и детски реквизити, како и поправка на постоечките во дел од населените места во неготинска општина. Како што информираат стручните служби, градежните активности опфаќаат набавка на материјали и поправка на постоечката урбана опрема и детски реквизити, како и обновување на подлогата на која тие се лоцирани. Согласно  проектот кој е во фаза на реализација, нова урбана опрема и детски реквизити се поставуваат во 4 села во општината и тоа Д.Дисан, Војшанци, Дуброво и Криволак.

  Во  ООУ „Страшо Пинџур“ - Неготино за време на летниот распуст се работеше на подобрувањето на енергетската ефикасност и осветлувањето на сите училници во старата училишна зграда. Комплетно во сите училници кои се наоѓаат во стариот училишен дел е изведено спуштање на плафоните со цел да се заштеди топлинска енергија и на истите се променија светилките со нови LED ламби. На тој начин, училиштето ќе  заштеди на сметките за струја, ќе го подобри осветлувањето,  како и визуелниот изглед на училниците- истакна директорот на училиштето Сашо Ѓорѓиев. Исто така, реализирани се и други активности со цел создавање подобри услови за одвивање и следење на воспитно-образовниот процес.