Деновиве во Кинотека на Македонија се одржа Првата регионална конференција на најдобрите наставници од повеќе држави од регионот. Конферецијата беше организирана од Асоцијацијата на најдобри наставници на чело со најдобрите наставнички во светски рамки Весела Богдановиќ и Жељана Радојчиќ- Лукиќ а со поддршка на Просветно дело и амбасадорите проф. д-р Кирил Барбареев, проф. д-р Сузана Киранџиска и м-р Ксенија Маказлиева- Трајчева,и имаше за цел да ја развие идејата за вмрежување и соработка на најдобрите наставници од регионот. Беа промовирани 40-те  најдобри наставници од овие простори кои се избрани според критериуми за високи достигнувања на меѓународно и државно ниво, залагања во локалната заедница, учество во меѓународни и државни проекти, учество на конференции, издадени трудови во областа на педагогијата и сл. На листата на најдобри наставници се најдоа и две наставнички од нашиот град, наставничката по Музичко образование во ООУ "Гоце Делчев", м-р Павлинка Вељаноска и наставничката по информатика во ООУ "Страшо Пинџур" Георгина Димова.

   Поради безбедносно изведување на планираните вежбовни активности, Командата на Гарнизонот на Армискиот полигон Криволак го известува месното население дека во периодот до 31-ви  овој месец на повеќе реони на полигонот ќе се изведуваат вежбовни боеви активности. Токму затоа, во наведениот период се забранува секакво движење и престој на луже, моторни возила и стока во овие реони, како и земање или допирање на неексплодирани проектили или средства кои можат да бидат опасни по животот на граѓаните. Доколку се пронајдат такви средства, потребно е да се известат надлежните од АП Криволак или во најблиската полициска станица. Стрелиштето на кое ќе се изведуваат боевите гаѓања ќе биде видно одбележано согласно законските прописи на АРМ, а ќе биде присутно и физичко обезбедување.

   Од Јавното комунално претпријатие „Коминалец“ информираат дека потрошувачите од Неготино кои со вода за пиење се снабдуваат од „Висока зона“ дека поради настанат дефект на транзитниот цевковод Ф 200 ќе има прекин во водоснабдувањето  денеска, петок 1-март. Екипи на „Комуналец“ се на терен и работат на отстранување на дефектот и нормализирање на водоснабдувањето.

   Од  Јавното претпријатие за државни патишта информираат дека се врши санација на мостот над реката Вардар на регионалниот пат Р1103, делница Неготино-Пепелиште, при што во наредниот период ќе се демонтираат постоечките АБ носачи, со што нема да може да се одвива сообраќајот по мостот, а со тоа регионалниот пат Неготино-Пепелиште ќе биде затворен за сообраќај. Паралелно со одвивањето на споменатите работи, Јавното претпријатие за државни патишта врши подготовки за оспособување за нормално одвивање на сообраќајот на локалниот пат Неготино-Криволак-мост на реката Вардар-приклучување на Р1103 кај селото Пепелиште. Се информираат сите граѓани дека поради присутната состојба на мостот ќе може да се одвива сообраќај на возила со вкупна маса од 7,5 тони и како ограничување во однос на висината на возила до 3,6 метри. Затворањето на споменатата делница треба да се случи кон средината на месец март за што јавноста благовремено ќе биде информирана. Имајќи предвид дека е предвидено патот да биде затворен за сообраќај подолг временски период, населението преку средствата за јавно информирање ќе биде информирано за текот на одвивањето на работите.

   Со сопствени средства во висина од околу 500.000 денари обезбедени од Општинското основно училиште „Гоце Делчев“ од Неготино, се изврши комплетно реновирање на санитариите во подрачното училиште во Д.Дисан. Како што информираше директорот на училиштето Петар Мантев, извршена е целосна промена на старата и нефункционална водоводна и фекална мрежа која е заменета со нова, поставени се нови врати, електрика, плочки и други елементи во сите простории, со што се придонесе за подобрување на хигиенските услови и за учениците и за наставниците од училиштето во Д.Дисан. Новите санитарии се веќе ставени во функција, а комплетното реновирање беше изведено во период од 25 до 30 денови.