На Армискиот полигон „Криволак“ денеска  се реализира програма за Денот за високи гости и отворен ден за медиумите на вежбовните активности кои ги изведуваат припадници од Армијата на САД, кои се дел од мултинационалната борбена група Исток од составот на „КФОР“. На Денот за високи гости  демонстрирани се вежбовни активности со боеви гаѓања од пешадиско вооружување со артилериска поддршка, како и летачки активности со хеликоптери УХ-60 кои се дел од вежбовните активности кои е реализираат на Криволак во периодот од 1 до 23 март 2019 година. На денот за високи гости присуствуваа командантот на силите на КФОР, генерал мајор Лоренцо Д’Адарио, командантот на ЗОК, генерал мајор Павле Арсоски и претставници од Министерството за одбрана, ГШ, Амбасадата на САД, претставници од локалната самоуправа и други гости. Ова е втор пат како Армискиот полигон „Криволак“ го демонстрира својот капацитет за изведување на обука и гаѓања со воздухоплови од страна на ВС на САД. Од АРМ информираат дека во понатамошниот период ќе следува една поинтензивна фаза на користење на овој воен полигон, не само од страна на нашите армиски единици туку и од страна на нашите сојузници со што ќе се потврди и можноста на нашиот придонес кон НАТО Алијансата.

   Денеска и утре Неготино е домаќин на информтивните денови за земјоделците кои се одржуваат во рамките на проектот „Заштита на водните ресурси со намалување на човековото влијание врз животната средина“ од ИПА програмата за прекугранична соработка кој се спроведува заеднички со водечкиот партнер, општина Алмопија од Грција, комуналното претпријатие од Алмопија и ЈП Комуналец од нашиот град. Во име на градоначалникот на општина Неготино Тони Делков кој поради службени обврски не можеше да присуствува на настанот, присутните ги поздрави и им посака успешна работа секретарот на општина Неготино Ивица Златковиќ, воведно обраќање имаше директорката на „Коминалец“ Марина Бојаџиева, проектниот менаџер Лолита Ристова изврши презентација на проектот „Заштита на водните ресурси со намалување на човековото влијание врз животната средина“ (Wa-mbrella), а за моменталната состојба со животната средина во општина Неготино говореше клучниот експерт за води и биодиверзитет Ѓоко Зороски, кој воедно се осврна и на заштитата на животната средина со акцент на управување со водните ресурси и примена на заштитните средства при земјоделските активности. Главната цел на проектот е одржливо управување со водата преку најважните начини на нејзино користење и тоа во 3 сфери: 1-наводнување, 2-водоснабдување и 3-канализација, а намерата е преку проектот да се намали преголемата експлоатација и деградација на водата, како и намалување на еколошките влијанија на човековите активности преку одржливо користење на природните водни ресурси во екосистемите на прекуграничната област. Предложено е вкупното времетраење на проектот да биде 22 месеци, истиот се спроведува во 3 фази, при што во тек е втората фаза од развојот на проектот кога ќе бидат преземени и најважните проектни активности. Земјоделците како целна група на овие информативни денови, покрај експертските излагања кои имаа и ќе имаат можност  да ги слушнат овие два дена, имаа можност да даваат свои предлози и препораки во правец на преземање активности за подобрување на состојбите во општина Неготино.Вториот отворен ден за земјоделците ќе се одржи утре (четврток) во големата сала на општина Неготино со почеток од 10,00 часот.

   Во присуство на претставници од македонската Агенција за енергетика во Неготино се одбележа Денот на енерегетската ефикасност. Во оваа прилика на пригоден начин директорот на Агенцијата за енергетика Нехри Емрула на градоначалникот на општина Неготино Тони Делков му го врачи позитивното мислење од Агенцијата за енергетика за подготвената тригодишна Програма за енергетска ефикасност на општина Неготино за период 2019- 2021 година, изработена од вработените во Заедничкото одделение за енергетска ефикасност на Вардарскиот плански регион. Од страна на раководителот на Заедничкото одделение за енергетска ефикасност на Вардарскиот плански регион Ванчо Петров за граѓаните на општина Неготино беше одржана презентација на тема „Енергетска ефикасност во домови и објекти“. Присутните имаа можност да се запознаат со   можностите и  придобивките од постигнување на  поголема енергетска ефикасност во нивните домови   и потенцијалите на  обновливи извори на енергија и  енергетска ефикасност во општина Неготино. По презентацијата, присутните и гостите од Агенцијата за енергетика ги  посетија просториите на Заедничкото одделение за енергетска ефикасност на Вардарскиот плански регион и се запознаа со неговата опременост и работа.