Поради безбедносно изведување на планираните вежбовни активности, Командата на Гарнизонот на Армискиот полигон Криволак го известува месното население дека во периодот до 30-ти овој месец (април) на повеќе реони на полигонот ќе се изведуваат вежбовни боеви активности. Токму затоа, во наведениот период се забранува секакво движење и престој на луѓе, моторни возила и стока во овие реони, како и земање или допирање на неексплодирани проектили или средства кои можат да бидат опасни по животот на граѓаните. Доколку се пронајдат такви средства, потребно е да се известат надлежните од АП Криволак или во најблиската полициска станица. Вежбалиштата на кое ќе се изведуваат боевите гаѓања ќе бидат видно одбележани согласно законските прописи на АРМ, а ќе биде присутно и физичко обезбедување.

   Со забавна програма која содржеше музичко-забавни изведби од страна на деца  и ученици на градскиот плоштад во нашиот град и маскенбалското дефиле кое се одвиваше по улиците низ градот, во Неготино денеска се одржа традиционалната манифестација „Маскенбал 2019г.“. Истата општина Неготино ја организираше во соработка со воспитно-образовните установи, вработените, учениците и нашите најмлади сограѓани. Во рамките на маскенбалското дефиле своите поединечни и групни маски ги презентираа дечињата од клоновите Мајски цвет и Пролет во склоп на детската градинка Фемо Кулаков од Неготино, ученици од основните училишта Гоце Делчев и Страшо Пинџур и средното општинско училиште „Св. Кирил и Методиј“. Дефилето се одвиваше  по главните улици Маршал Тито и Партизанска со пристигнување на плоштадот од повеќе правци. Учесниците на маскенбалот и многубројните посетители кои беа присутни и го следеа дефилето, имаа можност да уживаат и во забавната програма во изведба на ученици од основните и средното училиште кои се претставија со музички перформанси, хумористични точки и денс изведби,а свој настап имаа и дечињата од двата клона на неготинската градинка.

   Во организација на СПД„Неготино“, а во соработка со општина Неготино, ООУ„Страшо Пинџур“ и Јавното претпријатие „Комуналец, во текот на утрешниот ден (сабота 30.03) ќе се реализира аколошка акција „Сите заедно за почисто Неготино“. Акцијата има за цел да се исчисти отпадот кој се наоѓа на несоодветни места за тоа притоа развивајќи ја свеста кај граѓаните за правилно управување со отпадот, како и да развие механизми за поддршка на граѓаните како подобро да се справат со неорганизираното и неконтролираното фрлање на отпад во нивната заедница. Активностите од акцијата ќе започнат од 08,00 часот од паркот кај градскиот Музеј, потоа се планира чистење долж главните улици „Маршал Тито“ и „Партизанска“,а акцијата ќе заврши  со расчистување на кругот на СРЦ„Младост“. Организаторот апелира до сите заинтересирани граѓани активно да се вклучат и да дадат сопствен придонес за посупешно спроведување на акцијата „Сите заедно за почисто Неготино“.