За исклучително краток период на просторот кој до неодамна претставуваше обична голина изграден е и пуштен во употреба нов градски забавен парк во населбата Саат – кула каде што во иднина населението од овој крај од сите генерации ќе може во одмор и релаксација да поминува дел од своето слободно време. Проектот е реализиран со средства од општинскиот буџет во висина од 2,5 милиони денари, а во негов состав поставена е фонтана, изградени се пешачки патеки во паркот и на околните улици, поставени се клупи за седење, како и повеќе разновидни елементи за забава и рекреација на најмладите сограѓани, а околината на ниовиот градски – забавен парк ќе биде оплеменета со зеленило. Градоначалникот Пане Трајков истакна дека во соработка со Агенцијата за млади и спорт предвидено е заокружување на овој простор со изградба на повеќенаменско игралиште од проектот за изградба на 100 маалски игралишта во Македонија, а се планира изградба  и на тениски терени.

   Стопанската комора на Македонија и Регионалната комора на Братислава – Словачка ја организираа завршната конференција на проектот – Зајакнување на малите и средни претпријатија – пат кон економски раст и пристапување кон Европската унија. Проектот има за цел на македонските партнери да им обезбеди словачки искуства за интеграција во ЕУ, развој на пазарот и на бизнис-амбиентот преку проверени мерки за поддршка на претприемништвото, како и подобрување на бизнис климата.Во рамките на проектот во Неготино е отворен нов бизнис инфо центар, односно регионален инфо – пулт со лице кое ги обезбедува услугите, а врз основа на здобиените информации од одржаните обуки. Новиот бизнис инфо центар треба да го обезбеди првиот контакт се претставниците на бизнис секторот и преку нивните оперативни услуги да обезбедат поддршка на развојот на приватниот сектор од општина Неготино.

   Претставници на општина Неготино учествуваа на работилница која ја организираа канцеларијата на УНИЦЕФ и Државниот совет за превенција од малолетничко престапништво, а на која се расправаше за активностите за имплементација на Законот за малолетничка правда согласно кој Советот на општината именува општински Совет за превенција на малолетничкото престапништво. Покрај именувањето на членови на ова тело, планирано е организирање тренинг-работилници за целите, задачите, надлежностите, составот, локалните превентивни програми, како и развивање на локални акциони програми за превенција на малолетничкото престапништво и третманот на малолетните сторители на кривични дела и прекршоци.

   Во рамките на одбележувањето на ,, Детската недела ,, одговорните и дечињата од неготинската градинка кои таму престојуваат, организираа низа активности за нејзино достојно одбележување. Меѓу другото, беше организирана заедничка посета на манастирот ,, Св. Ѓорѓи ,, ликовна изложба, театарска претстава и други активности. Дел од истите проследи и градоначалникот на општина Неготино Пане Трајков кој во таа прилика на директорката Весна Нацева и врачи ваучер од 30.000 денари – средства наменети за купување играчки за потребите на децата кои пак присуството на првиот човек на градот го искористија да презентираат дел од она што како знаење и умешност го стекнуваат низ секојдневното присуство во градинката. Предходно, а имајќи го предвид проблемот со недостигот од вода посебно во летните месеци, општина Неготино за потребите на градинката обезбеди и цистерна за вода во вредност од 180.000 денари.

    Врз основа на усвоениот Акционен план на Владата на РМ за 2011-та година, а во организација на локалната самоуправа и Центарот за управување со кризи, на подрачјето на општина Неготино започнаа активностите за расчистување на одделни речни корита со цел за обезбедување непречено одводнување на поројните атмосферски води. Работите најпрво се изведуваат во Индустриската зона каде што се врши чистење на поројот од наноси и вегетација од шамак во должина од околу 400 метри, со што се верува дека ќе се избегне евентуалното нанесување штети на постоечките стопански капацитети. Согласно планираните активности, предвидено е сечење на вегетацијата и извлекување на истата, машински ископ и расчистување на наноси и  ниска вегетација, исфрлање на комунален и градежен отпад, како и проширување и продлабочување на речните кроита.
Активностите продолжуваат на речните корита Брестов дол во должина од 500 метри, Дисанска река во атарот на селото – 1.000 метри, Тремничка река – 2.500 и на локалитетот Мушанци во должина од околу 2.000 метри.