Со изведување на ритуалот на симболично закројување на виновата лоза и со желби за богат и квалитетн род и вистинско вреднување на трудот на лозарите, во Неготино на пригодна свеченост во рамките на одржувањето на  Неделата на виното  беше одбележан верскиот празник Свети Трифун. Првите лози ги закроија и го означија стартот на работите во лозарството Заменик-претседателот на Владата на РМ и Министер за финансии Зоран Ставрески и Градоначалникот на општина Неготино Пане Трајков. Вицепремиерот Ставрески ја искористи можноста да ги информира лозаропроизводителите дека на нивните сметки веќе се легнати средствата по основ на субвенции во висина од 3,5 милиони евра, како и тоа дека се создадени услови за деблокирање на сметката на ВВ ,, Повардарие ,, со што деновиве ќе се создадат услови за исплата на околу 300.000 евра за производителите кои овде го предале својот род.

  Да се разбие стравот кај населението од изградбата на капацитет за топење на челик и да се утврди дека инвестицијата ќе биде во рамките на законите – беа основните цели на одржувањето на јавната расправа по иницијативата на компанијата ИГМ-трејд од Кавадарци за изградба на железара во атарот на неготинските села Дуброво и Тремник, а на која присуствуваа и активно учество зедоа министрите за транспорт и врски и за животна средина Миле Јанакиевски и Абдулаќим Адеми. По извршената презентација од претставниците на потенцијалниот инвеститор за евентуалните вложувања, дел од присутните со став дека изградбата на еден ваков капацитет негативно ќе влијание врз развојот на лозарството и винарството – гранки со кои се занимаваат и егзистенција обезбедуваат најголем дел од граѓаните на општина Неготино. Одтука и предлогот во јавната расправа да се вклучат и стручни лица од Министерството за земјоделство со изработка на елаборат за можните влијанија на објектот врз лозарството и винарството.

  Трета година по ред во организација на локалната самоуправа на градскиот плоштад во Неготино беше организиран заеднички дочек на Новата 2012-та година. Невообичаено пријатното време за овој период од годината придонесе голем број сограѓани да се одлучат и најлудата ноќ да ја дочекаат на градскиот плоштад. За одличната атмосфера и доброто расположение на присутните со својот настап се погрижија Младен Ничиќ, Александар Петров, групата Чардак, Антигона бенд, а како главна sвезда на вечерта настапи и го подигна расположението на присутните нашата позната естрадна уметница Блага Петреска-Кондратенко. Присутните на дочекот на Новата година имаа можност да ги користат угостителските услуги кои им беа на располагање, а благодарение на одличната атмосфера што се создаде, за време организираниот дочек за цело време беше весело и разиграно. Исто така, одлична атмосфера имаше и во бројните угостителски објекти во градот во кои и овој пат беше организиран заеднички дочек на Новата 2012-та година. Самата прослава помина беспрекорно и без ниту еден регистриран инцидент.