Општина Неготино ги ангажираше првите 31 невработени лица за извршување на јавни работи во наредните 6 месеци, а во согласност со проектот на Владата на РМ. Градоначалникот на општина Неготино Пане Трајков кој оствари средба со лицата кои ќе бидат работно ангажирани и со раководителката на Бирото за вработување Кристина Чадамова  истакна дека за оваа намена за 20 ангажирани лица средствата се обезбедени од Владата, додека работниот ангажман на 11 лица ќе се плаќа со средства од општинскиот Буџет. Притоа, беше потпишан и Меморандумот за ангажирање на 31 лице, а основната цел на проектот е да им се помогне на социјално ранливи семејства каде што никој не е вработен. За време на шестмесечниот работен ангажман лицата ќе добиваат финансиски надомест од 7.600 денари месечно во кои е вклучено осигурување во случај на несреќа при работа и професионално заболување, а го задржуваат и правото на здравствено осигурување.

  Амбасадорот на САД во Македонија Пол Волерс престојуваше во еднодневна посета на Неготино при што оствари средба и се задржа во разговор со градоначалникот Пане Трајков. Домаќинот Трајков упати јавна благодарност на САД кои и даваат поддршка на земјата и на Неготино, како и на агенцијата УСАИД со чија поддршка општината во изминатите десетина години реализираше проекти кои се од приоритетно значење за Неготино, како што се реконструкција на училишта, поддршка на НВО и сличлно, а високиот гостин беше запознат и со потенцијалите на општината за развој на индустријата, можностите за привлекување нови инвеститори, како и можностите за отворање на нови работни места. Амбасадорот Волерс посочувајќи оти е првпат во Неготино информираше дека со градоначалникот Трајков зборувале за предизвиците со кои се соочува првиот човек на градот, за невработеноста, за отворањето нови фирми, економскиот раст на градот и за проблемот со недостигот од вода за пиење. Тој подвлече дека ги посетува градовите во Македонија бидејќи смета дека градоначалниците се тие кои се справуваат со проблемите на граѓаните и кои најдиректно ја познаваат основата на нивните проблеми.

   За време престојот во Неготино, вицепремиерот и министер за финансии Зоран Ставрески одржа работна средба со претставници на бизнис секторот од општината на која се расправаше за повеќе актуелни теми. Меѓу другото, тој ги информираше присутните дека Владата на РМ од Европската инвестициона банка има обезбедена кредитна линија во висина од 100 милиони евра – средства кои се веќе достапни за малите и средни претпријатија. Оваа мерка е донесена со цел да се подобри ликвидноста на фирмите и да се зголеми производството во малите и средните претпријатија кои се најпогодени од кризата во Европската унија, а достапните кредити се со поволна фиксна каматна стапка од 5,5 отсто. Вицепремиерот Ставрески додаде дека 70 отсто од новата кредитна линија е наменета за мали и средни претпријатија, а останатите 30 отсто ќе можат да бидат искористени и од страна на големите компании за приоритетни проекти. Тој ги повика компаниите да изготват квалитетни бизнис планови кои се неопходни за подигнување кредит од третата кредитна линија, со напомена дека рокот на враќање е 8 години со 2 години грејс период.
На средбата вицепремиерот информираше дека во законскиот рок исплатени се вкупно 740 милиони денари по основ на субвенции за лозарите, винариите и земјоделските стопанства и најави дека ваквата поддршка продолжува и во иднина. Претставниците на бизни секторот беа информирани и за напорите што Владата ги прави за донесување на гасот како енергенс во нашата држава и за изградба на гасификациска режа, додавајќи дека ова е значајно од причина што гасот до Неготино би требало да пристигне во првата фаза од изградбата на гасификацискиот систем.