Со средства во висина од близу 200.000 денари обезбедени од сопствениот Буџет, локалната самоуправа Неготино изврши набавка на 6 нови компјутери и еден проектор за потребите на општинската администрација. Истите се веќе распоредени во повеќе одделенија и тоа во одделението за урбанизам и градежништво, за комунални работи, кај инспекторот по патен сообраќај, како и за потребите на останати вработени во општинската администрација.

   Општина Неготино беше посетена од претставници на Американската амбасада во Македонија и војници од инжинерската бригада на армијата на САД сместени во базата во Германија, а кои во април годинава ќе земат активно учество на воена вежба на полигонот Криволак, но за време престојот ќе се ангажираат и за давање придонес кон локалната заедница. На средбата, беа предложени повеќе проекти за работа, а како дел од процесот беа посетени детската градинка, основното училиште во градот и подрачното училиште во селото Долни Дисан. По извршениот увид на лице место, припадниците на инжинерската бригата на армијата на САД констатираните состојби ќе ги презентираат пред своите претпоставени, по што ќе се изврши избор кој проект ќе биде реализиран додека престојуваат во општина Неготино.

   Дарко Јусуфов од неготинското село Дуброво беше најумешен и најсреќен и прво стигна до светиот крст што по повод верскиот празник Богојавление – Водици беше фрлен во водите на реката Вардар од страна на Македонската православна срква Свети Атанасиј од Неготино. Оовој верски спектакл благодарение на прекрасните временски услови и интересот на граѓаните, беше проследен од неколку илјади посетители кои присуствуваа на чинот на фрлањето и фаќањето на крстот. Во водите на Вардар влегоа вкупно 33 учесници, а на најуспешниот Јусуфов градоначалникот на општина Неготино Пане Трајков му подари пригодна награда.