Работници на градежното претпријатие Урбан инвест интензивно се ангажирани на изведување на градежни активности во централното подрачје на Војшанци со што овој простор во селото добива сосема нов и урбанизиран лик. Во моментов се работи на поставување на тротоарите на овој простор, а паралелно течат и останатите активности предвидени со планот за работа. Меѓу другото, во Војшанци ќе бидат асфалтирани и неколку улички во центарот, ќе бидат изградени пешачки патеки со бехатон коцки, а целиот простор ќе биде хортикултурно уреден. За реализација на целокупниот проект од Буџетот на општина Неготино ќе бидат издвоени средства во висина од 4,5 милиони денари.

   Новоизбраниот градоначалник на општина Неготино Ванчо Апостолов кој на локалните избори ја доби довербата на граѓаните да ја води локалната самоуправа во наредниот четиригодишен период, денеска  приреди прием за граѓаните на општината и сите посетители ги почести со торта изработена специјално за оваа пригода. Апостолов во пригодното обраќање искажа јавна благодарност за огромната доверба што ја доби на изборите, им се забалгодарите на сите кои гласале за него, но и општо на сите кои излегоа на гласање и вети посветена, чесна и транспарентна работа во неговиот мандат. Новиот градоначалник средбата ја искористи и да размени мислења за актуелни општински состојби со претставници на бизнис-секторот, директори на јавни претпријатија и установи, а се задржа и во краток разговор со обичните граѓани кои дојдоа да му го честитаат мандатот.

   Новоизбраниот градоначалник на општина Неготино Ванчо Апостолов денеска оствари работна средба со досегашниот градоначалник Пане Трајков на која беше извршено примопредавање на градоначалничката функција со што Апостолов и по добиеното решение од ОИК официјално стана прв човек на општина Неготино. Низ кафе муаебет и во релаксирана атмосфера, поранешниот и актуелниот градоначалник разменија мислења за актуелни состојби од функционирањето на локалната самоуправа, проектите кои се реализираат и кои ќе се реализираат во наредниот период, кадровската екипираност и програмите за работа на Одделенијата при локалната самоуправа, односно за сите оние моменти кои се во тесна врска со функционирањето на градоначалникот и општината.По завршувањето на работната средба, Ванчо Апостолов и официјално ја презеде функцијата градоначалник на општина Неготино која ќе ја извршува во наредниот четирогодишен период.

   Во просториите на Општинската изборна комисија се одржа свечениот чин на доделувањето на уверението на новоизбраниот градоначалник на општина Неготино Ванчо Апостолов од редовите на ВМРО-ДПМНЕ кој настапи како кандидат на коалицијата За подобра Македонија кој ќе биде прв човек на локалната самоуправа во наредниот четиригодишен период. Инаку, на одржаните локални избори Апостолов оствари убедлива победа добивајќи ја довербата на вкупно 6.957 избирачи или 57,97 отсто од запишаните гласачи од евидентираните во единствениот избирачки список со што градоначалничкиот мадат го доби по првиот круг од изборите. На изборите за градоначалник, од запишаните 15.942 избирачи на галсање излегоа 12.519 избирачи при што се констатирани 12.002 важечки и 517 неважечки ливчиња.

   На пригодна свеченост организирана од страна на Општинската изборна комисија на новоизбраните советници кои во наредниот четиригодишен период ќе ги застапуваат интересите на граѓаните во Советот на општина Неготино, денеска им беа врачени уверенијата. Инаку, во новиот состав на Советот мнозинството од 9 советници го има коалицијата ,, За подобра Македонија ,, која на советничката листа освои 6.199 гласови, со 5 советници ќе биде застапен ,, Сојузот за иднината ,, чија советничка листа ја доби довербата на 3.782 гласачи на локалните избори, додека со 1 советник благодарените на освоените 801 глас ќе биде партијата Народно движење на Македонија. Инаку, на изборите од запишаните 15.942 избирачи од општина Неготино на гласање излегоа 12.519 гласачи, при што ОИК констатираше 11.891 важечко и 628 неважечки гласачки ливчиња за листите со кандидати за советници.