Во рамките на спроведувањето на годишната Програма за уредување на градежното земјиште на подрачјето на општина Неготино започнаа градежните активности во урбаниот блок 5 во градот. Станува збор за проект со чија реализација се врши поставување на водоводна и канализациона мрежа  во должина од 220 метри за потребите на жителите кои во овој урбан блок имаат изградено индивидуални станбени домови и кои ги имаат подмирени своите обврски во делот на комуналните давачки. Градежните работи се финансирани со средства од Буџетот на општина Неготино во висина од околу 2 милиони денари.

   Во рамките на одбележувањето на Денот на пожарникарите, 12-те припадници на Противпожарната единица Неготино беа посетени од градоначалникот на општина Неготино Ванчо Апостолов и секретарот на општината Сашко Јанев  со кои  се задржаа во краток разговор и ги информираа за нивното тековно функционирање. Притоа, тие извршија и практична демонстрација со ставање во функција на трите противпожарни возила и останатата опрема со која вршат гаснење на пожарите, додека командирот Иле Илиев ја потенцираше одличната соработка што ја имаат и поддршката што ја добиваат од локалната самоуправа. Градоначалникот Апостолов ја истакна подготвеноста на општината секогаш во рамките на расположливите можности и финансиски средства да го поддржуваат функционирањето на ПП единица од Неготино и им посака да имаат што е можно помалку работа. На свеченоста присуствуваа и демонстрацијата ја проследија и дечиња од Детската градинка Фемо Кулаков од Неготино.

   Стотина матуранти од Средното општинско училиште Св. Кирил и Методиј денеска им се придружија на своите врсници од повеќе градови од Македонија и од Европа и во ритамот на музиката танцуваа ,, квадрил ,, во присутво на голем број посетители кои го проследија нивниот настап на градскиот плоштад. Од име на градоначалникот на општина Неготино Ванчо Апостолов претставник на локалната самоуправа на матурантите им го честиташе матурирањето истакнувајќи дека сите понатамошни успеси на матурантите се важни, но најважно од се е да ги исполнат очекувањата на нивните родители, бидејќи станува збор за млади луѓе полни со позитивна енергија кои располагаат со се што е потребно да зачекорат кон нови почетоци и предизвици. Н аматурантите кои денеска танцуваа на градскиот плоштад, матурирањето им го честиташе и директорката на СОУ Св. Кирил и Методиј Неготино, Маја Тефова.

   Во организација на општина Неготино, а во соработка со Градскиот шаховски клуб “Неготино”, оваа година по втор пат ќе се одржи Отвореното градско првенство во шах – Неготино 2013. Првенството ќе започне на 24 мај (петок) во 17.00 часот, а истото ќе го отвори покровителот на овој настан – Градоначалникот на општина Неготино г-нот Ванчо Апостолов. Право на учество на првеството имаат сите заинтересирани граѓани на општина Неготино. Наградниот фонд за најдобрите учесници на турнирот изнесува 17.000 денари. Пријавувањето за учество се врши кај претседателот на ГШК Неготино Трајче Недев, на тел. број 075/416-496, надоцна до 24 мај (петок) до 13.00 часот.