На пригодна свеченост во општинската сала, градоначалникот на Општина Неготино Ванчо Апостолов на членови на 21 семејство кои во месеците ноември и декември имале принова им додели ваучери во вредност од 7.000 денари врз основа на донесената одлука од страна на Советот на општината за стимулирање на наталитетот и искоренување на ,, белата чума ,, на територијата на неготинска општина. Инаку, еднократната парична помош за новородено дете се доделува по вторпат, откако предходно за време празникот на општина Неготино беа доделени ваучери за 31 новородено бебе. Имајќи предвид дека на годишно ниво на територијата на општина Неготино се раѓаат околу 200 новороденчиња, од општинскиот Буџет се предвидени средства во висина од 1,5 милион денари.

   Градоначалникот на општина Неготино Ванчо Апостолов и вработени во општинската администрација  посетија 4 од вкупно 7-те игрални кои функционираат на територијата на општината  во кои престојуваат дечиња од предучилишна возраст до 5,5 години и кои овде ги стекнуваат основните знаења во пресрет на нивното поаѓање на училиште. Посетите беа искористени  градоначалникот Апостолов на дечињата да им ја честита Новата година со желби за добро здравје и успех во учењето притоа доделувајќи им од име на општината новогодишни пакетчиња, при што во игралната во Црвени Брегови истите ги добија 10, а во игралната во Војшанци 13 дечиња. Градоначалникот Апостолов исто така ги посети и новогодишни пакетчиња им додели и на по 20-тина дечиња кои престојуваат во игралните во Тимјаник и Долни Дисан.  Во знак на благодарност тие за посетителите во сите игрални беше изведена пригодна програма и на тој начин најмладите му се заблагодарија на градоначалникот за посетатата и подароците.

   Општина Неготино објави продажба, односно отуѓување на градежно земјиште по пат на електронско јавно наддавање  соспственост на РМ вон населено место за стопански комплекс на катастарска парцела 1.000 со намена за лесна индустрија и стоваришта и тоа вкупно 7 атрактивни парцели со почетна цена од 61 денар за метар кавдратен. Исто така, се продаваат и 3 градежни парцели во Урбан блок 5.1 во Неготино наменети за изградба на објекти за индивидуално домување со почетна цена од 373 денари за метар кавдратен, како и две градежни парцели во детален урбанистички план во Неготино за индивидуално домување со почетна цена од 61 денар за метар квадратен. Општината објави и продажба на една градежна парцела за домување во станбени згради и тоа една парцела со почетна цена од 680 денари за метар квадратен. Пријавите за учество на јавното наддавање можат да се достават до 23.01.2014 година на адреса на општина Неготино, а јавното наддавање ќе се одржи на 27.01.2014  во термините 9, 10, 11 и во 12 часот. Бидејќи станува збор за градежни локации со извонредно атрактивна местоположба во близина на автопатот и железничката пруга, од локалната самоуправа очекуваат голем интерес за нивна продажба.

   Претставници на локалната самоуправа предводени од градоначалникот на општина Неготино Ванчо Апостолов денеска им доделија новогодишни пакетчиња на лицата од неколку категории ранливи групи на граѓани. Најнапред беа посетени претставниците од Здружението на слепи лица од Неготино, веднаш потоа градоначалникот оствари средба и со самохраните родители кои имаат формирано и функционираат во Здружение, а работниот дел заврши со посета на Дневниот центар за престој на лица со ментален хендикеп Порака- Неготино. Доделувајќи им ги пакетчињата градоначалникот Апостолов на сите им ги честиташе Новогодишните и Божикните празници со искрени желби за добро здравје и многу среќа, а примателите се заблгодарија на вниманието и подароците и за присутните изведоа пригодна програма.