Во салата на општината се одржа јавна презентација за издржливоста на физибилити студијата за изводливост на проектот „Реконструкција на водоводната мрежа во Неготино и изградба на нов резервоар за вода од 500 м3“ - што претставува дел од сетот-мерки и проекти што општината ги предвидува за реализација со единствена цел за подобрување на водоснабдувањето во градот и обезбедување на 24 часовно континуирано и редовно водоснабдување на граѓаните. Градоначалникот на општина Неготино Ванчо Апостолов ги запозна присутните дека после 60 години ќе дојде до реконструкција на водоводониот систем во Неготино кој е во должина од околу 70 километри, со тоа што ќе бидат опфатени 15 улици во должина од 8 километри кај кои стручни лица од ангажирана реномирана фирма утврдија дека има најголеми загуби кои на некои места достигнуваат и до 70 отсто од количините кои доаѓаат до домовите на граѓаните. Инаку, во моментов до Неготино од регионалниот водовод Лукар дотекуваат 77 литри вода во секунда-количини кои би биле доволни за нормално водоснабдување, ако не се присутни големиот број на дефекти кои придонесуваат за нејзино губење. Проектот ќе се реализира со кредитни средства од Светска банка во висина од 850.000 евра со каматна стапка од 0,6 проценти, грејс-период од 3 години и рок на отплата од 10 години.

   Општина Неготино ја објави Објавата за отуѓување на градежно земјиште сопственост на РМ по пат на електронско јавно наддавање кое ќе се одржи на 31 јули оваа година во 9 и во 10 часот. Станува збор за продажба на градежни парцели во Индустриската зона Неготино на вкупна површина од 12,5 хектари, при што се продаваат 10 градежни парцели со различна површина кои се движат од 4.300 до 18.315 метри квадратни со почетна цена од 61 денар за метар квадратен. Имајќи предвид дека станува збор за Индустриска зона која се наоѓа на извонредно атрактивна локација во центарот на Македонија, со регионален и автопат во близина, како и железничка пруга, градоначалникот на општина Неготино Ванчо Апостолов очекува огромен инетерс за објавените парцели и апелира до сите заинтересирани домашни и странски правни и физички лица благовремено до 28 јули да ја достават потребната документација за да можат да учествуваат на јавното наддавање. Инаку, предходно во оваа индустриска зона беа продадени градежни парцели на вкупна површина од 12,5 хектари.

   Врз основа на извршените мерења  од страна на стручни лица во близина на селото Дуброво е констатирано дека поради настанати дефекти доаѓа до големи загуби на водата за пиење која доаѓа од регионалниот водовод Лукар, со измерена количина на загуба од 5,5 литри во секунда, загуби што не само што влијаат на водоснабдувањето на месното население и ТЕЦ Неготини и Фабриката за кабли, туку придонесува и за губење на водата која доаѓа до граѓаните на Неготино. Токму затоа општината ангажираше стручни лица кои го отстранија дефектот со што се зголеми и статичкиот притисок во наведената секција која сега достигнува и до 8-9 бари. Со средства од општинскиот Буџет во висина од 4.000.000 денари се изврши комплетна рекоснтрукција на водоводната мрежа во должина од 1 километар на потегот од местото викано Бучето до село Дуброво. Со реализацијата на овој проект ќе дојде до подобрување на водоснабдувањето кај населението од Дуброво и во ТЕЦ Неготино и Фабриката за кабли, а бенефитите ќе ги почуствуваат и граѓаните на општина Неготино.

   Во кругот на Полициската станица во Неготино, денеска беше одбележана 13-годишнината од загинувањето на бранителот Косте Волкански кој трагично го загуби животот бранејќи го територијалниот интегритет и суверенитет на Република Македонија во воениот конфликт од 2001 година. Членовите на најтесното семејство на Волканоски, делегација од општина Неготино предводена од градоначалникот Ванчо Апостолов, колеги полицајци, претставници на Полицискиот синдикат, на Армијата на РМ, Здружението на бранители, делегации на политички партии и други граѓани со полгање на свежо цвеќе на спомен бистата подигната во чест на Волканоски  му оддадоа почит на загинатиот бранител. Претседателот на полицискиот синдикат Диме Михаилов истакна дека не смее да се дозволи иднината да ги избрише спомените на Косте, а токму за таа цел беа организирани 4-тата по ред крводарителска акција и 8-иот по ред меморијален турнир во фудбал.