Во рамките на програмата за одбележување на Денот на градот – 8ми Ноември, традиционално, по шести пат беше организиран турнирот во табла “Неготино 2014”. Учество на истиот зедоа 64 учесници, кои во период од три дена (6-8 ноември) колку што траеше турнирот, одиграа многу интересни мечеви, а најдобрите по систем на елиминација дојдоа до самата завршница. Овогодишен победник на турнирот е Драган Доневски, кој за постигнатиот резултат доби диплома и парична награда од 8.000 денари, вицешампион е Дарко Илиевски кој доби диплома и парична награда од 5.000 денари, а третопласиран е Дарко Накев кој покрај диплома за трето место заработи и награда од 2.000 денари. Покрај наградите за најдобрите тројца учесници беа доделени и благодарници за учество турнирот. Наградите и признанијата ги додели градоначалникот на Општина Неготино, г-нот Ванчо Апостолов, кој во рамките на затварањето на турнирот вети дека традицијата за одржување на овој настан ќе продолжи и во иднина.

   Во присуство на голем број заинтересирани граѓани на општина Неготино и гости од земјава и странство во кино-салата на Центарот за култура се одржа свечената седница на Советот на општина Неготино по повод празникот на градот 8-ми Ноември и 70 годишнината од ослободувањето на Неготино. Во пригодното обраќање градоначалникот на општина Неготино Ванчо Апостолов се задржа на неколку капитални проекти чија реализација е во тек и со чие завршување, како што рече тој, редукциите на водата ќе бидат минато за неготинци, а паралелно за во наредните 100 години ќе се обезбеди континуирано 24 часовно водоснабдување за сите граѓани на Неготино неазвисно од зоната во која живеат. Исто така, додаде Апостолов, иако немаме директни ингеренции во делот на вработување, создаваме услови за отворање производствени капацитети фабрики во кои би се вработиле невработените граѓани од општина Неготино. На свечената седница беше прикажан 16 минутен аудио-видео материјал за реализираните и проектите кои се во тек помеѓу двата празника,а се одржа и пригодна културно уметничка програма.

   Во рамките на одржувањето на свечената седница на Советот на општина Неготино, претседателот на Советот Јордан Паунов ги прогласи, а градоначалникот на општината Ванчо Апостолов ги додели наградата и признанијата по повод празникот 8-ми Ноември. Годинашен добитник на највисоката општинска награда е Трговското друштво Фабрика слобода АД Неготино, а наградата ја прими генералниот директор Цане Коцевски кој наедно и се заблагодари од името на добитниците на наградата и признанијата за укажаната доверба. Признанија им беа доделени на Лукас Мирингер-менаџер на ДММ Дрекслмајер Мануфактурниг Македонија, Здружението на граѓани Ековита, младиот планинар Ване Бошев, Ристе Волчев-магистрант на Градежен факултет и на Центарот за регионален одржлив развој. Наградата и признанијата на добитниците им беа доделени за остварените резултати и нивниот придонес во развојот, унапредувањето и афирмацијата на општина Неготино.

   Во организација на Музејот на град Неготино и локалната самоуправа беше извршена промоција на вториот том на Зборникот на политички затвореници во периодот од 1945 до 1990 година, дело кое следува неколку години по објавувањето на првиот том во 2007 година. Градоначалникот на општина Неготино Ванчо Апостолов во своето обраќање истакна дека Зборникот е изработен и издаден на иницијатива и предлози доставени до Здружението на граѓани политички прогонувани, затворани и осудувани за самобитноста на македонскиот народ и неговата државност до авторот Никола Андонов кој по објавувањето на првиот, го издаде и вториот том од Зборникот во кој се внесени нови податоци и нови документи. Самиот факт, рече Апостолов, што станува збор за втор том, доволно говори за квалитетот на првиот и потребата од објавување на нови документи од страна на Андонов. Авторот Никола Андонов рече дека во двата тома на Зборникот се  претставени сведоштвата за човековите страдања на политички прогонетите и затворани лица и најави дека доколку постои нови и необјавен материјал, тој ќе пристапи кон изготвување и на третиот том од Зборникот на политички затвореници.

   Продолжува континуираното и што е најважно навремено доделување на вредносните ваучери во вредност од 7.000 денари што општината од сопствениот буџет ги издвојува за родителите кои имаат новороденчиња. Така беше и денеска на пригодната свеченост што се одржа во салата на општината кога градоначалникот на општина Неготино Ванчо Апостолов додели 31 ваучер на родители кои во месеците септември и октомври имале принова во семејството. По 14 месеци од донесувањето на одлуката и нејзиното стапување во сила, градоначалникот Апостолов заедно со денешните има доделено вкупно 214 ваучери за новородени деца во општина Неготино.