Градоначалникот на општина Неготино Ванчо Апостолов пред присутните на дводневната информативна работилница што ја организираат локалната самоуправа и УНДП, а која започна денеска, ја презентираше информацијата за досегашното функционирање на проектот „Општинско корисна работа“ на подрачјето на неготинска општина, притоа искажувајќи задоволство од досегашните позитивни искуства од спроведувањето на овој проект во општина Неготино. Апостолов додаде дека бидејќи искуствата и бенефитот од имплементирањето на овој концепт се покажа како многу позитивни во нашата општина, локалната самоуправа е заинтересирана да го применува и во иднина, а за таа цел, и овој пат согласно повикот ќе биде поднесена апликација со предлог и во иднина да биде поддржан веќе постојниот и позитивно прифатен концепт со можност за внесување иновативни компоненти. Проектот, според градоначалникот,  е од особена важност како за невработените и корисниците на социјална помош-ангажирани лица, исто така и за корисниците кое се опфатени во вакви и слични социјални сервиси и услуги.

  Во петок, на 1^ви Април, во организација на Општина Неготино и образовните установи од општината ќе се одржи традиционалниот градски маскенбал, кој што ќе вклучува маскенбалско дефиле и културна програма на бината на градскиот плоштад со изведби на децата и учениците од двете основни и средното училиште “Св.Кирил и Методиј”. Во рамките манифестацијата со свои маски ќе се претстават децата од двата клона на детската градинка “Фемо Кулаков”, учениците од основните училишта “Страшо Пинџур” и “Гоце Делчев” и средното општинско училиште “Св.Кирил и Методиј”. Манифестацијата ќе започне со маскенбалското дефиле кое ќе тргне од двете основни училишта “Гоце делчев” и “Страшо Пинџур” точно во 12.00 часот на 1 Април (петок), ќе се движи по улиците “Партизанска” и “Маршал Тито” и ќе пристигне на градскиот плоштад од двата правци, каде што од 12.30 часот ќе започне културната програма на бина во рамките на која децата и учениците од Неготино ќе се претстават со хумористични точки и музички и денс изведби.

  „Работите околу изградбата на новиот резревоар во Пепелиште кој што е со зафатнина од 200 м3 вода се одвиваат според однапред утврдената динамика и договорот склучен со фирмата изведувач „Жикол“ од Струмица и се очекува истите да завршат во предвидениот рок за тоа, а веќе престојното лето проблемот со водоснабдувањето да биде минато за жителите на Пепелиште и за правните лица кои функционираат во ова село“ – истакна градоначалникот на општина Неготино Ванчо Апостолов при извршениот увид на работите на резервоарот кој е во фаза на интензивна изградба. Претставници на фирмата-изведувач во разговорот го информираа градоначалникот Апостолов за досега реализираните и активностите кои ќе следат во понатамошниот период, со единствена цел изградбата на резервоарот да биде завршена навреме, како и поставувањето на потисниот цевковод во должина од 1.260 метри со што ќе се придонесе за рамномерно распределување на водата во сите зони во Пепелиште. Средствата за реализацијата на овој проект се обезбедени од Европската инвестициона банка.

   Претставници на една исклучително талентирана генерација млади фудбалери-членови на Фудбалскиот клуб „Јанг бојс“ од нашиот град денеска беа примени и се задржаа во краток разговор со градоначалникот на општина Неготино Ванчо Апостолов. Повод за средбата е освојувањето на второто место на  екипата на „Јанг бојс“ на неодамна одржаниот Балкански турнир во фудбал кој се одржа во Сандански-Бугарија со настап на фудбалери родени од 2005 година. Како што информираа претставниците на Управата на клубот, на овој турнир учествувале 68 екипи од Балканот и во таква исклучително силна конкуренција, неготинските фудбалери го освоија одличното второ место. Градоначалникот Апостолов во обраќањето го поздрави овој успех на фудбалерите на „Јанг бојс“, им порача и понатаму вредно да работат, тренираат и да ги изучуваат тајните на фудбалската игра, што неминовно ќе води кон остварување на вакви и слични резултатски постигања на задоволство на сите љубители на фудбалот, а како и досега, и понатаму ќе ја имаат неговата и поддршката на општина Неготино во рамките на расположливите финансиски средства.