На неодамна одржаните локални избори на територијата на неготинска општина, листата со советници на СДСМ и коалицијата „За живот во Македонија“ освои најмногу гласови-6.349 и со тој резултат обезбеди 8 мандати во Советот на општина Неготино, додека советничката листа на ВМРО-ДПМНЕ и коалицијата „За подобра Македонија“ освои 5.287 гласови со обезбедени 7 мандати во општинскиот Совет во кој делуваат вкупно 15 советници.
Еве ги и новите советници чии мандат трае 4 години. СДСМ и коалицијата „За живот во Македонија“ во Советот на општината ќе бидат претставувани од носителот на листата Диме Витанов, Гордана Филипова, Вуле Младеновиќ, Дане Мајсторчев, Трајче Димков, Ивана Трајкова, Игор Ѓорчев и Борче Коцев. ВМРО-ДПМНЕ и коалицијата „За подобра Македонија“ ќе ги застапуваат носителот на листата Петре Манчев, Љупчо Пасинечки, Гордана Јованова, Зоран Стојанов, Флорида Илиевска, Игор Јованов и Трајко Стафилов.
Се очекува во најскоро време да се одржи конститутивна седница на која ќе се избере претседател на Советот на општина Неготино и ќе бидат формирани соодветните комисии, по што советниците ќе започнат со одржување седници и носење одлука од нивниот делокруг на работа.

   Од денеска 18-ти октомври започна да тече и до 31 октомври  оваа година трае рокот за поднесување кандидатури за добитници на наградата и признанијата по повод празникот на општина Неготино-8-ми Ноември. Општина Неготино го објави огласот за пријавување на кандидатури за добитници на највисоките општински награди и признанија кои се доделуваат по повод празникот на општината 8-ми Ноември-Денот на ослободувањето на Неготино. Како што информираат од локалната самоуправа признанијата се доделуваат секоја година како израз на највисоко општинско признание што се доделува за посебни постигнувања во одредени области на поединци и институции од општината. Според одлуката, наградата и признанијата по повод 8-ми Ноември се доделуваат на поединци, претпријатија и други организации, установи, здруженија на граѓани и заедници чии дела, односно резултати во работењето и дејствувањето, придонесле за нивна лична и афирмација на општина Неготино. Право на поднесување на кандидатури за добитници на наградата и признанијата имаат сите заинтересирани граѓани, претпријатија, установи, здруженија, месни заедници и групи граѓани, а крајниот рок за доставување предлози е вторник 31 октомври. Процедурата налага пристигнатите предлози најпрво да ги разгледа Комисијата за награди и признанија при општинскиот совет, а конечната одлука за добитниците ја донесуваат советниците во Советот на општина Неготино. Наградите и признанијата на добитниците новоизбраниот градоначалникот на општина Неготино Тони Делков ќе им ги додели на свечената седница која ќе се одржи во среда на 8-ми Ноември Денот на ослободувањето на нашиот град.

   Во организација на општина Неготино, Министерството за животна средина и просторно планирање, Европската делегација во РМ и ЕУ Инфоцентарот во Скопје денеска во Неготино беше одбележана „Европската недела на мобилност“. Стотици ученици од основните и од средното училиште од нашиот град, Здруженија на граѓани, претставници на Совет на млади на општина Неготино и други преку возење на велосипеди и други алтернативни средства со можност за одбирање секојдневен транспорт се вклучија во одбележувањето на овој настан кој протече во најдобар ред. Учесниците во одбележувањето на „Европската недела на мобилноср“ стартуваа кај Музејот на град Неготино и движејќи се по однапред утврдена маршрута пристигнаа на градскиот плоштад каде што и заврши настанот.

Агенда:

Контакт:  Бранко Вељанов вработен во општина Неготино (моб.070/376-749)

               Митко Толовски вработен во општина Неготино (моб.076/212-094)