Заврши деветиот по ред традиционален турнир во табла, кој и оваа година беше дел од програмата организирана по повод одбележувањето на Денот на градот – 8ми Ноември. На турнирот учество зедоа шеесетина таблаџии претежно од помладата генерација, кои на тридневниот турнир одиграа интересни партии, а најдобрите по систем на елиминација дојдоа до завршницата. Победник на турнирот е Ацо Тренев на кој по првпат му појде од рака да го освои овој масовен турнир, иако е редовен учесник на истиот изминатите години. За постигнатиот резултат победникот доби диплома и парична награда од 8.000 денари, додека поразениот во исклучително интересното финале, вицешампионот на турнирот Марјан Ристов доби диплома и парична награда од 5.000 денари. Третопласиран на турнирот е Наум Илиевски, кој во малото финале го совлада Александар Миладинов и на тој начин се стекна со диплома за трето место и заработи парична награда од 2.000 денари. Покрај наградите за најдобрите тројца учесници беа доделени и благодарници за учество турнирот.

   Со одржувањето работни средби со жителите на селата Тремник, Дуброво и Војшанци започна серијата состаноци кои градоначалникот на општина Неготино Тони Делков ќе ги одржи со претставниците на месните и урбаните заедници во населените места и во градот. Придружуван од претседателот на Советот Диме Витанов, советникот Борче Коцев и вработени во локалната администрација Делков пред присутните истакна дека овие средби ќе бидат правило во неговиот 4-годишен мандат, а не исклучок, а нивна цел е да се слушне гласот на граѓанинот, проблемите со кои населението се соочува во одредена средина каде живее и функционира, да се слушнат предлози и мислења за приоритетите за решавање, за по завршувањето на сите средби да се сублимира се она што било кажано на состаноците, а градоначалникот, Советот и администрацијата да преземат соодветни мерки за надминување и санирање на одредени состојби, се разбира во зависност од финансиската моќ на општината. Според градоначалникот Делков, наскоро ќе се започне со изготвување на Буџетот на општина Неготино за 2018 година и програмата за работа, па токму затоа од овие средби се очекува да се слушнат што е можно повеќе предлози, мислења и сугестии, кои ќе бидат вградени во програмата и ќе придонесат за решавање на проблемите на граѓаните од општина Неготино.

   Трговското друштво „Дуки Дасо“ ДООЕЛ Неготино е добитник на највисоката општинска награда „8-ми Ноември“  која се доделува по повод Денот на ослободувањето на градот. Пред присутните на свечената седница одлуката ја презентираше претседателот на Советот Диме Витанов, а наградата и признанијата на добитниците им ги врачи градоначалникот на општина Неготино Тони Делков. Покрај осмоноемвриската награда, беа доделени и 5 признанија кои им беа врачени на Илија Цветковски-филмски работник, Атанас Николов-атлетичар маратонец, Ракометниот клуб Вардар од Неготино, Ленче Лазова-крводарител и Ангела Глигорова-научен истражувач.

   На денот кога општина Неготино прославува 73 години слободно живеење, се одржа свечена седница на општинскиот Совет која ја отвори и присутните ги поздрави претседателот Диме Витанов кој како прв меѓу еднаквите ги повика сите советници да работат на носење заеднички одлуки, заклучоци, предлози и решенија за доброто на граѓаните на општината. Пригоден говор по повод празникот на општината 8-ми Ноември имаше градоначалникот на општина Неготино Тони Делков кој потенцираше дека за време на мандатот максимално ќе се труди и посветено ќе работи на остварување на проектите ветени во неговата Програма со која ја доби довербата на граѓаните на локалните избори. Делков рече дека очекува поддршка од Владата на РМ и домашни и меѓународни финансиски организации и дека приоритет ќе му биде решавањето на проблемот со водоснабдувањето. За таа цел, според градоначалникот, по спроведената ревизија на досега реализираните проекти, ќе се пристапи кон поставување приклучоци до домаќинствата кои живеат на улиците каде што водоводната мреже е реконструирана, а најави и реконструкција на мрежата на нови 6  улици во градот и поставување нови приклучоци.Во соработка со МТСП Делков најави преземање активности за изградба на нова детска градинка, реконструкција на улици во градот и населените места, систем за подобро сервисирање на комуналните услуги, подобрување на енергетската ефикасност на територијата на цела општина, обезбедување нови места за паркирање, изградба на затворен градски пазар и соработка со младите како активен чинител во заедницата. Градоначалникот Делков најави и поефикасна соработка со бизнис заедницата, поставување водовод и канализација во Индустриската зона, продажба на парцели во зоната Дуброво-Тремник, како и реализација на бројни други проекти за подобрување на севкупните услови за живеење во општина Неготино.