Министерот без ресор Аксел Ахмедовски денеска беше во работна посета на Неготино, оствари средба со неготинскиот градоначалник Тони Делков. Рече дека како министер во Владата, надлежен за спроведување  на Стратегијата за Ромите 2014-2020 година, ги посетува општините во кои има ромско население. Ова ни беше прва средба со градоначалникот на Неготино. Разговаравме околу надлежностите, помошта која може да ја добијат околу проекти за инфраструктурни објекти кои се однесуваат на населени места во кои живее ромско население. Разговараме и околу вработувања на лица од ромска националност во општината и други институции, мислам дека Неготино ќе добие референт за ромски прашања, како некои други општини, нагласи Ахмедовски, најавувајќи локален акциски план, кој е основа за соработката со општината. И министерот и градоначалникот изразија задоволство од првичната средба и нагласија дека соработката ќе продолжи, во интерес на сите.

   Во присуство на градоначалникот на општина Неготино Тони Делков, претставници на изведувачот  „Ју-бај2“ од Скопје и надзорот над изградбата, започнаа работите за изградба на водоводна, фекална и атмосверска канализација во УЗ 8 блок 1. Станува збор за проект чија вкупна вредност на работите изнесува 14.000.000 денари, а истиот се спроведува преку Министерството за транспорт и врски со средства одобрени од Европската инвестициона банка.  Се гради комунална инфраструткура и тоа АБ канал, краци на улиците 3 и 4, а се поставува и водоводна, фекална и атмосверска мрежа во рамките на проектот „Линиска инфраструктура за изградба на комунална инфраструктура во општина Неготино. Согласно проектот, ќе биде изграден канал во должина од 330 метри, фекална мрежа со опфат на краци во должина од 808 метри, атмосверска канализација од 372 метри и водовод за улиците 3 и 4 со опфат на краци во должина од 809 метри. Градоначалникот Делков изрази оптимизам дека целиот проект ќе биде навремено завршен со што ќе се создадат услови за непречено функционирање на постоечките стопански капацитети, но и да се стимулираат потенцијални инвеститори токму на овој урбанизиран простор да изградат нови капацитети.

   Во рамките на реализацијата на проектот „Мојот убав град“ на градоначалникот на општина Неготино Тони Делков деновиве работници на ЈП Комуналец беа ангажирани на хортикултурно уредување на неколку локации во градот. Се разубавуваше централното градско подрачје, паркот во близина на Музејот, околината на спортската сала Младост и други локации во Неготино. Како што информираат одговорните, засадени се зимзелени ползавци, лаванда, трендафили, едногодишни хризантеми и други украсни жбунесто растенија, со единствена цел за разубавување на просторот каде истите се посадени, а наедно на повеќе места се изврши косење на нараснатата трева. Активностите од проектот „Мојот убав град“ продолжуваат и ќе се одвиваат во континуитет на територијата на целиот град, а планирано е хортикултурно уредување и на влезот и излезот во и од Неготино со нивно расчистување и садење на украсни растенија.