Во пресрет на одбележувањето на верскиот празник Свети Пророк Илија-Илинден кој се слави како селска слава во Војшанци и Пепелиште, се изврши чистење и миење на централните подрачја и на дел од улиците во овие две населените места во општина Неготино. Активностите за чистење и миење ги изведоа работници на локалното јавно комунално претпријатие „Комуналец“ од Неготино кои интервенираа на локации каде што предходно беше утврдена потреба од такво нешто. Ова од причина што за време одбележувањето на овој верски празник, овие населени места и нивните жители кои имаат и празнуваат селска слава се посетувани од голем број гости, па токму затоа и беше извршено чистењето и миењето на централните подрачја и дел од улиците во Војшанци и Пепелиште.

   Поради безбедносно изведување на планираните боеви активности, Командата на Гарнизонот на Армискиот полигон Криволак го известува месното население дека во периодот од 30 јули до 24 август, оваа година, на повеќе реони на полигонот ќе се изведуваат вежбовни боеви активности. Токму затоа, во наведениот период се забранува секакво движење и престој на луже, моторни возила и стока во овие реони, како и земање или допирање на неексплодирани проектили или средства кои можат да бидат опасни по животот на граѓаните. Доколку се пронајдат такви средства, потребно е да се известат надлежните од АП Криволак или во најблиската полициска станица. Сите стрелишта и вежбалишта на кои ќе се изведуваат планираните активности ќе бидат видно одбележани согласно законските прописи на АРМ, а ќе биде присутно и физичко обезбедување.

   Деновиве во дворот на Општинската Установа Музеј на град Неготино, се отвори изложбата “ГОЛЕМОТО СИНО“ или “ФОРТИФИКАЦИЈА НА СИНО“ на младата уметница Валентина Илијевска. Оваа самостојна изложба на минијатури е продолжение на приказната започната во 2013-та година со мини-артури. Минијатурите се поставени како бедемски страни кои го штитат дводимензионалниот досега син квадрат кој провејува низ целокупното творештво на Валентина. Сега, овој квадрат е поставен тродимензионално, оправдувајќи го постоењето покрај со метафизичкиот свет, сега и со својата објективност. Изложбата содржи 28 минијатури поставени на седум постаменти кои ги симболизираат седумте светски чуда. Станува збор за корпус од дела поставени на седум пункта, тематски и стилски поврзани со еден концепт којшто во себе вклучува цртеж, објект и просторна интервенција.

  Летниот период кога и бројот на дечињата кои престојуваат во градинката е намален, раководниот тим и вработените го користат за изведување зафати во двата клона со единствена цел за подобрување на севкупните услови за престој и подобрување на условите за работа на вработениот персонал. Како што информираше директорката Јана Коцева, во моментов се одвиваат работи и во двата клона „Мајски цвет“ и „Пролет“, а активностите предвидено е да продолжат  и во наредниот период. Меѓу другото, во објектот „Пролет“ во 3 занимални во јаслениот дел извршено е лакирање и обелување, заменети се сите чешми, зафати се изведуваат во тоалетите, ходниците, скалниците, стругање и менување на врати и друго. Во клонот „Мајски цвет“ во тек е менувањето на шкафовите во сите занимални со набавка на нови, а планирани се зафати и на рамниот покрив на објектот „Пролет“, набавка на машини за садови за потребите на двата објекта, набавка на нова опрема ( бироа и столици ) за потребите на воспитниот и стручниот кадар, како и многу други активности со кои ќе се придонесе за подобрување на условите за престој на дечињата и извршување на работните активности на вработените.