Согласно ветувањата на градоначалникот на општина Неготино Тони Делков дека во сите села во општината ќе се изврши санација на 1 до 2 улици со гребен асфалт, деновиве во селото Тремник беа реализирани активности за тампонирање на 2 улици. Едната улица на која по цела ширина беше поставен и со валјак набиен асфалтот е со должина од 280 метри, а втората со должина од 120, што значи дека е извршена санација на улици во должина од 400 метри. Според стручните служби, поставен е слој од 15-20 см гребен асфалт, а истиот е обезбеден од реконструкцијата на делницата од автопатот. Во наредниот период со гребен асфалт ќе се тампонираат улици и во останатите села во општина Неготино.

   Во рамките на спроведувањето на општите мерки за заштита на населението од заразни болести согласно годишната програма и оперативниот план за ДДД за оваа година, општина Неготино во координација со надлежните институции и служби по втор пат реализираше акција за прскање против комарци. Притоа, извршено е прскање на територијата на град Неготино, повеќе села во нашата општина, а беа опфатени и локации по течението на реката Вардар. Адултната дезинсекција со машинско прскање ја изврши Зотокс од Скопје, а средствата за активноста се обезбедени од буџетот на општина Неготино.

   Врз основа на Договорот за соработка помеѓу Агенцијата за вработување на РМ (АВРМ), Програмата за развој на Обединетите нации (УНДП)  и општина Неготино, Оперативниот план за активни програми и мерки за вработување и услуги на пазарот на трудот за 2018 година усвоен од Владата на Република Македонија, Програмата Општинско – корисна работа финансирана од Буџетот на Агенцијата за вработување на РМ, објавен е јавен оглас за пријавување на  евидентирани невработени лица за вклучување во  Програмата општинско - корисна работа.
Се повикуваат сите евидентираните невработени лица кои се заинтересирани да се вклучат во програмата Општинско-корисна работа, проект  “Продолжување на функционирањето на игралните во руралните средини и воведување на нови иновативни социјални услуги за деца со посебни потреби вклучени во образовниот процес”  за работно ангажирање со скратено работно време за период од 9 (девет) месеци заради стекнување на вештини и постепено вклучување на пазарот на труд, да се пријават во Агенција за вработување- Центар за вработување Неготино.
Евидентираните невработени лица кои ќе бидат вклучени во Програмата „Општинско-корисна работа“ ќе бидат работно ангажирани со скратено работно време со 20 (дваесет) работни часови неделно, при што за време на работниот ангажман од 9 (девет) месеци статусот на невработените лица  останува непроменет, а на невработените лица-корисници на социјална помош за времетраење на работниот ангажман ќе им биде активно правото на користење на социјална помош.Право на учество во Програмата „Општинско-корисна работа“ имаат сите невработени лица, при што предност ќе имаат лицата кои за прв пат се јавуваат за учество во Програмата.
За кандидатите  кои ќе бидат избрани и вклучени во Програмата Општинско-корисна работа се предвидува паричен надоместок во висина од 9.000,00 денари месечно, со вклучен персонален данок на доход и осигурување од случај на несреќа при работа и професионално заболување.

   Врз основа на годишната Програма за работа на Одделението за комунални работи и сообраќај при општина Неготино, на неколку локации во градот се започна со замена и поставување на нова вертикална сигнализација, а по завршувањето на оваа активност ќе следува поставување и на хоризонтална сигнализација. Во моментов поставувањето на вертикална сигнализација се одвива во централното градско подрачје со опфаќање на улиците Маршал Тито, Партизанска, Ацо Аџи Илов, Ставре Ставрев, Пекарев, Јане Сандански, Борис Кидрич и други. Се очекува оваа активност да заврши за 10-тина денови, по што ќе се започне и со поставување на хоризонтална сигнализација. Се апелира до сите учесници во сообраќајот за внимателно движење додека се одвиваат овие активности, а за што од страна на одговорните е поставена соодветна сигнализација.