Градоначалникот на општина Неготино Тони Делков оствари средба (втора по ред) со учениците-членови на новинарската секција при СОУ „Св.Кирил и Методиј“ од Неготино во која членуваат 20-тина ученици кои ги подготвуваат текстовите и  работат на уредувањето и издавањето на училишниот весник „Младина“. Како што градоначалникот беше информиран од членовите на новинарската секција, „Младина“ се печати во тираж од околу 200 броја и се издава по повод патрониот празник на училиштето, а во него можат да се најдат информативни содржини кои во најголем дел се однесуваат на активностите на училиштето и постигнувањата на ученици на локални, регионални и државни натпреварувања. Од негово лично име и како градоначалник на општина Неготино, Делков ги поздрави нивните несебични напори за создавање на овој училишен весник и нивната креативност која е неопходна за спроведување на еден ваков проект, а средбата беше искористена за размена на мислења за младинските политики, потенцијални истражувања и информирање на јавноста за резултатите од истите,како и на други теми од заеднички интерес. Учениците-членови на новинарската секција изразија благодарност за приемот и несебичната поддршка што ја имаат и ќе ја имаат градоначалник на општина Неготино Тони Делков.

  Поради безбедносно изведување на планираните вежбовни активности, Командата на Гарнизонот на Армискиот полигон Криволак го известува месното население дека во периодот до 10-ти овој месец (мај) на повеќе реони на полигонот ќе се изведуваат вежбовни боеви активности. Токму затоа, во наведениот период се забранува секакво движење и престој на луѓе, моторни возила и стока во овие реони, како и земање или допирање на неексплодирани проектили или средства кои можат да бидат опасни по животот на граѓаните. Доколку се пронајдат такви средства, потребно е да се известат надлежните од АП Криволак или во најблиската полициска станица. Вежбалиштата на кое ќе се изведуваат боевите гаѓања ќе бидат видно одбележани согласно законските прописи на АРМ, а ќе биде присутно и физичко обезбедување.

  На 10 мај 2019 год. (петок) со почеток од 20.00 часот во НУ Центар за култура “Ацо Ѓорчев” ќе гостува театарот од Соко Бања со познатата театарска претстава “Арсеник и старите тантели”. Претставата е најпопуларната и најизведуваната комедија на американскиот драмски писател Џозеф Кеселринг базирана на црн хумор. Одлична можност за љубителите на театарот да ја проследат оваа урнебесна комедија во изведба на гостите од Р. Србија. Влезот за претставата е 100 денари.