Општина Неготино оваа година подготви дводневна богата програма по повод прославaта на 8-ми Ноември - Денот на градот и одбележувањето на 75 години од ослободувањето на Неготино. Настаните ќе бидат организирани на 7ми и 8ми ноември (четврток и петок) на повеќе различни локации, а свечената седница на Советот на општината ќе се одржи во петок - 8 Ноември со почеток од 11.30 часот во кино салата на Центарот за култура “Ацо Ѓорчев” во Неготино.

  За потребите на граѓаните, но пред се на туристите во нашиот град, со цел подобрена достапност на локалните институции, винарии, угостителски објекти, сместувачките капацитети, археолошки локалитети и сите други знаменитости и услуги кои ги нуди општина Неготино, обезбедивме така наречена Info - Touch постојка.  Оваа Info - Touch постојка работи врз принцип на специјална андроид апликација изработена исклучуво за општина Неготино. За многу краток временски период во употреба ќе биде пуштена и андроид апликацијата за широка употреба на сите смарт телефони Постојката се наоѓа во дворот на општинската зграда и од денес е достапна за сите граѓани да можат слободно да ја користат.

   Во рамките на редовните работни активности, градоначалникот на општина Неготино Тони Делков, претседателот на Советот Диме Витанов и вработени во локалната самоуправа остварија работна посета на ЈП„Комуналец“ и средба со директорката Марина Бојаџиева и дел од вработените. Средбата беше искористена за взаемно информирање за досега реализираните активности на локалното комунално претпријатие и на општина Неготино во делот на работењето на претпријатието, за тековните, но и за активностите кои се дел од програмата за работа и дополнително треба да се спроведат. Констатирано е дека со заедничка координација значително е подобрена состојбата со водоснабдувањето што резултираше во летниот и есенскиот период да нема редукции на водата за пиење, извршена е набавка на геофон и ултразвучен мерач  за навремена детекција на загубите на вода, хигиената во градот и населените места е на задоволително ниво, набавен е нов ровокопач за потребите на Комуналец, а наскоро се очекува и набавка на возило канал џет за отшушување на јами и канализации што е од голема потреба за претпријатието. Градоначалникот Делков беше информиран дека за разлика од порано кога платите на вработените доцнеа по повеќе месеци, сега личниот доход на вработените во Комуналец им се исплаќа навремено и нема заостанати плати, а редовно се плаќаат придонесите за здравствено и пензиско осигурување.

    Градоначалникот на општина Неготино Тони Делков, директорот на Агенцијата за млади и спорт Дарко Каески и претставници од Советот на општина Неготино присуствуваа на воведувањето во работа за реконструкција на спортската сала „Младост“-проект кој градоначалникот им го  вети на граѓаните на општина Неготино во програмата за работа. Според динамиката на работите, ќе се изврши комплетна замена на старата со нова подна и кровна конструкција на салата со средства од Агенцијата за млади и спорт, а општина Неготино ќе обезбеди средства за дооформување на соблекувалните и поставување електрична мрежа, со единствена цел да го вратиме сјајот на овој, некогаш, прекрасен објект. Градоначалникот Делков од негово име и од име на граѓаните на нашата општина му се заблагодари на директорот Каески за одобрениот проект за изградба на детски базен во склоп на СРЦ„Младост“, со што овој простор ќе се заокружи како неодминливо катче за спортување, одмор и релаксација. Директорот Каески истакна дека реконструкцијата на салата, после долги години запуштеност, станува реалност во согласност со политиките на Агенцијата за создавање места кои ќе бидат собиралишта за младите од неготинска општина и каде што тие, но и идните генерации, ќе имаат пристојно место за спортување и водење на здрав живот. Каески информираше дека вредноста на реконструкцијата на салата е 12.000.000 денари со краен рок за завршување на работите до март 2020 години, но со напори реконструкцијата на објектот да заврши и порано од предвиденото.