Градоначалникот на општина Неготино Тони Делков, министерот за локална самоуправа Горан Милевски, заменик-министерот за животна средина Јани Макрадули, директорот на Центарот за развој на Вардарскиот плански регион Марко Колев и голем број гости од градот, земјава и странство денеска присуствуваа на свеченото пуштање во употреба на реконструираниот објект Спомен костурница. Како што истакна министерот Милевски реализацијата на овој проект е пример како еден градоначалник ги реализира проектите од својата програма и од еден руниран и запуштен простор, се успеа да се изгради пријатно катче за сите граѓани на општина Неготино. Проектот е вреден 7,2 милиони денари со подеднакво учество на општина Неготино и Министерството за локална самоуправа-Биро за регионален развој. Градоначалникот Делков истакна дека со проектот се изведени скали, изградена е и ставена во функција фонтана, паркинг-простор, пешачки и трим патеки, летна сцена, поставена е електрика и водовод, а целиот простор е хортикултурно уреден. Воедно, упати јавна покана до граѓаните на општина Неготино да повелат и да го посетат овој простор каде што можат да минуваат дел од своето слободно време, но и апелирапе за внимателно однесување за да не дојде до оштетувања на целиот простор на реконструираната Спомен костурница.  

   Со прием на гости од земјава и странство и положување на свежо свеќе од страна на повеќе делегации на спомен-бистите на паднатите борци во НОВ започна одбележувањето на Денот на ослободувањето на нашиот град 8-ми Ноември. Празнувањето продолжи со одржувањето на свечената седница на Советот на општината која ја отвори и присутните ги поздрави претседателот Диме Витанов, а пригодно обраќање за значењето на денешниот празник имаше градоначалникот на општина Неготино Тони Делков. На свечената седница присутните имаа можност да проследат аудио-видео материјал за реализираните проекти и активности на општина Неготино помеѓу двата празника, по што се пристапи кон доделувањето на наградата и признанијата по повод Денот на ослободувањето. Според одлуката на Советот на општина Неготино годинашни добитници на осмоноемвриските признанија се Дионис Пашлаков од општествено-промотивна и туристичка дејност, Страшо Андов од хуманитарната дејност, Роберт Ристов од областа на културата и Марија Јанева од областа на спортот. Највисоката награда 8-ми Ноември постхумно му беше доделена на Лазар Димов од областа на општествено политичката дејност. Свечената седница заврши со мини-концерт на Пламенка Трајковска „Гудачко трио“.

   Стотина ученици и во 2019-та година зедоа активно учество на традиционалните улични трки во Неготино-настан кој е дел од програма за одбележување на празникот на општина Неготино-8-ми Ноември. Под менторство на своите наставници и професори, ученици од двете основни училишта од градот „Гоце Делчев“ и „Страшо Пинџур“, како и ученици од средното училиште „Св. Кирил и Методиј“ учествуваа во натпреварувањето со цел да остварат што е можно подобар пласман. Присутните на градскиот плоштад, каде што беше и целта, а стартот од кај градскиот Музеј, имаа можност да следат возбудливи и до крај неизвесни трки, во кои победникот се решаваше во последните метри. По завршувањето на трките, следеше чинот на прогласувањето на најуспешните во своите категории, а признанијата и медалите им ги врачи секретарот на општина Неготино Ивица Златковиќ кој на најдобрите им честиташе на постигнатиот успех, а наедно до сите натпреварувачи упати благодарност за учеството на настанот.