Градоначалникот на општина Неготино Тони Делков, дополнителната заменик-министерка за труд и социјална политика Санела Шкријељ, претставничката на МТСП Мабера Камбери и директорката на неготинската градинка Јана Коцева склучија договор за учество на општина Неготино во проектот „Инклузија на деца Роми во предучилишно образование“. Проектот во нашата општина ќе започне да се спроведува од месец февруари во други просторни услови во селото Криволак каде што ќе престојуваат дечиња од македнска и од ромска националност со целодневен престој,а покрај постоечките воспитувач и негувател ќе биде ангажирана и една негувателка од ромската заедница. Целта на проектот „Инклузија на деца Роми во предучилишното образование“ во општина Неготино е отстранување на постоечките бариери за пристап до предучилишните установи на ромските дечиња на возраст од 3 до 6 години, инклузија на децата и нивна социјализација, како и зајакнување на свеста кај нивните родители за важноста на раниот детски развој и образованието на нивните деца.

   Чесниот крст кој на Богојавление-Водици беше фрлен во водите на реката Вардар, а лицето што го фати го подари на општина Неготино, на 23 овој месец во времето од 09,00 до 13,00 часот беше изложен на градскиот плоштад во Неготино со цел за негова поголема достапност до населението и за остварување на една хумана цел, собирање финансиски средства за лекување на нашиот сограѓанин Дарко Видони. Во периодот од 4 часа собрани се средства во висина од 14.580 денари кои веднаш по завршувањето на активноста се уплатени на посебната сметка за донации за лекување на Дарко Видони од Неготино. Покрај учеството во оваа хуманитарна активност, општина Неготино преку Советот на општината одобри дополнителни средства наменети за лекување на нашиот сограѓанин Дарко.

   И оваа година во рамките на одбележувањето на празникот на лозарите и винарите „Св.Трифун“ ќе се одржи натпревар во дегустација на вина и ракии произведени од индивидуални производители. За таа цел, организаторот-општина Неготино ги информира сите заинтересирани за учество на натпреварот дека рокот за поднесување мостри од бели и црвени вина и ракии е до понеделник (10.02.2020г.) во времето од 08,00 до 16,00 часот во просториите на локалната самоуправа. Производителите истите можат да ги достават до одговорното лице Дени Трајков на 3-ти спрат во зградата на општина Неготино, а поблиски информации можат да се добијат и на телефонскиот број 078-822-292. Традиционално, и оваа година поднесените мостри ќе бидат дегустирани и оценувани од страна на стручни лица-енолози кои ќе одлучат кои вина и ракии ќе добијат признинија и награди за квалитет. Наградите и признанијата на најдобрите индивидуални производите на домашни вина и ракии градоначалникот на општина Неготино Тони Делков ќе им ги врачи на денот на одржувањето на централниот настан по повод „Св.Трифун“ на 14-ти февруари кој ќе се одржи на градскиот плоштад во Неготино.

   Советот на општина Неготино на последната одржана седница на 24.01.2020 година едногласно донесе одлука За поништување на Одлука бр. 07-875/16 од 16.10.2009 година и поништување на Одлука бр. 08-245/6 од 20.05.2019 година на Совет на општина Неготино. Со поништувањето на овие одлуки, депонија на територијата на општина Неготино нема да се гради.