Со поставувањето на хоризонтална и вертикална сигнализација на кружниот тек на влезот и излезот во и од Неготино, комплетно се финализираа работите на овој проект. Стручните служби при локалната самоуправа истакнуваат дека со поставувањето на сигнализацијата протокот на возила ќе се одвива побрзо и побезбедно, а тоа пак значи зголемена безбедност во сообраќајот за сите моторизирани граѓани, како и за пешаците, уште повеќе ако се има предвид фактот дека во близина е и СОУ„Св. Кирил и Методиј“ каде што настава посетуваат ученици  кои се движат токму на оваа локација.

   Во рамките на ТАВ програмата, во Тимјаник во тек е целосна реконструкција со тампонирање и асфалтирање на 2 улици во вкупна должина од 450 метри. Едната улица (9) која се асфалтира е во должина од 158 метри и со ширина од 5,5 метри со поставување на дренажни цевки, а вредноста на работите изнесува 2.120.000 денари. Асфалтирањето на втората улица (14) е во должина од 285 метри и со ширина од 5,5 метри, а вредноста на работите изнесува 2.900.000 денари, со тоа што на оваа улица е изведен зафат со поставување на решетка за одводнување на атмосверските води. Изведувач на работите е градежната фирма „Градба промет“.

  Денеска остварив работна средба со претставници на амбасадата на Соединетите Американски Држави и со претставници на Армијата на Република Македонија за цивилна соработка со населението кои беа во посета на општина Неготино. На средбата од нивна страна бев информиран за претстојната воена вежба која во месец мај, наредната година, ќе се одржи на Армискиот полигон Криволак. Разговаравме и за досегашната соработка на амбасадата на САД и општина Неготино преку која во моментов се спроведува проект за оградување на СОУ,, Св. Кирил и Методиј во нашиот град. На средбата договориме соработката да продолжи и наредната година преку заедничка реализација на проекти кои ќе бидат од корист за локалната заедница.

  Во општинската установа Музеј на град Неготино се одржа концерт на Дуото КИРОВСКИ, во состав на Љубиша Кировски (виола и виолина) и Маја Шутевска-Кировска (пијано). Камерното дуо Кировски е оформено во 1993 година и од основањето до денес има реализирано бројни настапи во државата и надвор од неа како: Хрватска (Загреб, Риека, Осиек, Пула), Србија (Белград, Нови Сад, Подгорица), Полска (Варшава, Краков), Италија (Трст, Фиренца), Швајцарија (Лозана), Бугарија, Англија (Лондон), САД (Њујорк), Германија, Северен Кипар. Во 1997 година дуото специјализира на Европската Моцарт Академија во Варшава, во Лозана се усовршуваат за изведба на сонати за виолина и пијано, во 1998 година се добитници на Специјалната награда на Ц.Е.И. (Централно Европска Иницијатива) на Меѓународниот натпревар за камерна музика Трио ди Триесте, Италија..
Репертоарот на дуото опфаќа дела од барокот до музиката на 20 век со над 50 сонати за виолина и пијано. Дуото Кировски посебно го негува македонското музичко творештво, редовно изведувајќи дела од македонски композитори. Така и во рамки на концертот одржан во градскиот музеј во Неготино беа изведени сонати за пијано и виолина од Х.Виетан, Ф.Сај, И.Фролов...но највпечатлива беше изведбата на прекрасната преработка на македонска песна “Јовано, Јованке“ и одбележувањето на 100 годишнината од раѓањето на аргентинскиот гениј Астор Пјацола со изведбата на познатата “Вуелво ал сур“... со тоа беше удостоена неготинската публика со прекрасно и крајно професионално изведен камерен концерт.
Концертот е поддржан од страна на министерството за култура на РСМ и се одржа според протоколите за заштита од КОВИД-19.