Точно на полноќ кога стрелките на часовникот се поклопија, ја испративме старата и ја дочекавме новата 2013-та година, по традиционалното одбројување од страна на водителката и присутната публика на градскиот плоштад и се разбира меѓусебното честитање на новата година со желби за многу здравје, среќа, љубов и успех на личен и професионален план, на градскиот плоштад во Неготино следуваше неколкуминутен спектакуларен огномет кој ги одушеви присутните на организираниот дочек на Новата година. За миг погледите на сите присутни се свртеа кон небото проследувајќи го огнометот, за кој средствата ги обезбеди локалната самоуправа Неготино.

  Во рамки на спроведувањето на годишната Програма за уредување на градежното земјиште на подрачјето на општина Неготино, работници на градежното претпријатие Градба промет ги изведоа финалните работи во делот на асфалтирањето на улицата која ги спојува двата дела од градот и  мостот на Тимјаничка река. Притоа, извршено е асфалтирање на улицата пред и после мостот во должина од над 100 метри, како и асфалтирање на самиот мост. За изведување на комплетните работи околу изградбата на мостото и спроведувањето на асфалтерските работи од Буџетот на општина Неготино беа издвоени средства во висина од 10 милиони денари. Се очекува, со ставањето на мостот и на улицата во функција да се зголеми фреквентноста на оваа обиколница околу градот, со што пак би требало да дојде до растеретување на сообраќајниот метеж во централното градско подрачје.