Како резултат на обилните врнежи од дожд дојде до зголемување на водостојот на реката Вардар, а тоа пак придонесе на столбовите на мостот да се соберат стебла кои го попречуваат нормалниот тек на реката и можат да придонесат за оштетувања на мостот. За таа цел, општина Неготино ангажираше специјализирана фирма која денеска реализираше активности за одглавување на насобраните стебла со нивно сечење со моторна пила и нивна дислокација на соодветен простор за тоа.

  На мое огромно задоволство денеска во мојот кабинет имав можност да ги примам и да се задржам во разговор со учениците од 4-то одделение од ООУ Гоце Делчев заедно со нивната наставничка Весна Јованова. Посетата беше во рамките на спроведувањето на наставната програма преку која учениците се запознаваат со функционирањето на општина Неготино, кои се правата, обврските и надлежностите на градоначалникот, како се избира градоначалник и колку трае неговиот мандат и слично. Искрено, бев позитивно изненаден од одличните познавања на учениците стекнати преку наставата за работата на градоначалникот и општината, а средбата ја искористивме учениците да постават и повеќе прашања до мене, на кои од срце и со задоволство дадов соодветни одговори.

 Покажувајќи општествена одговорност, фирмата „Саше мигоз“ од нашиот град во координација со локалната самоуправа и без финансиски надомест, со сопствена механизација и работна рака, изврши комплетно расчистување на депонијата кај социјалната зграда во Неготино. При реализацијата на оваа активност, собрани се смет, земја и шут кои со 10 камиони се транспортирани на градската депонија Бучето.

  За потребите на Јавното претпријатие „Комуналец“ општина Неготино изврши јавна набавка на натриум хипохлорит (хлор) согласно годишните потребите на комуналното претпријатие. Хлорот ќе биде наменет за третман на водата за пиење,т.е. прочистување во населените места во општина Неготино кои со вода за пиење не се снабдуваат од градскиот водовод, односно во селата Војшанци, Пепелиште, Криволак, Тремник, Д.Дисан, Курија и Црвени Брегови и тоа во случај на заматување на водата за пиење и нејзино хлорирање. Станува збор за набавка на количина од 11.000 килограми натриум хипохлорит за третман на водата за пиење во предходно споменатите населени места, хлор кој е според стандардот МКС FN 901: 2013 или еквивалентен.