Локалната библиотека „ Страшо Пинџур“ Неготино започна со реализација на проектот „Приказна низ прошетка“- прв од ваков вид во нашата држава.  Проектот кој се реализира со поддршка на Општина Неготино вклучува трајно инсталирани десет табли во паркот на ул.„Маршал Тито“ спроти Музеј на град Неготино на кои има поставено содржини адаптирани за деца. Содржината креирана од библиотеката ќе се менува еднаш месечно. Првата поставка е приказна од енциклопедиски карактер и го опфаќа живиот свет на Арктикот.
„Приказна низ прошетка“ е едукативен проект кој на  работењето на библиотеката и дава една нова димензија,  при што делот на  здравиот развој на децата и едукацијата се промовираат  на еден неконвенционален и иновативен начин. Децата имаат можност низ едукативна прошетка во парк  на забавен начин да читаат приказни и да научат многу нови информации и факти. Оваа прва поставка е замислена како една мала детска „експедиција“  на Арктикот .

   Заедно со голем број сограѓани од општината присуствував на настанот кој традиционално се одржува на големиот христијански празник Богојавление-Водици со осветување на водите на реката Вардар и фрлањето на крстот. Десеттина храбри момчиња влегоа во студените води на Вардар, а најсреќен и најбрз од нив беше 21-годишниот Петар Давитковски од Црвени Брегови кој прв го  фати крстот. Од мое лично име и од име на општина Неготино на сите им честитав на храброста, а на Петар му врачив подарок-телевизор. Тој од МПЦ,, Св. Атанасиј,, доби Библија и икона, а од генералниот спонзор Зегин машина за перење. На сите православни христијани од општина Неготино им го честитам празникот Богојавление-Водици со желби за добро здравје и среќа. БОГ СЕ ЈАВИ!

   На мое огромно задоволство, денеска во кабинетот ја примив нашата сограѓанка Стефани Николова која на последното Балканско првенство во борење во слободен стил у-15 во категоријата до 66 кг стана вицешампионка и се закити со сребрен медал како членка на боречката репрезентација на Македонија. На Стефани, која беше придружувана од тренерот Јане Мелов и членови на Боречкиот клуб Неготино, и честитав на огромниот успех на ова престижно натпреварување на кое учествуваа борачи од сите балкански држави, а кое се одржа во Ксанти-Грција. Воедно, и посакав и во иднина да постигнува врвни резултати кои ќе придонесат за нејзина лична, но и афирмација на општина Неготино, а борењето како еден од најуспешните спортови во градот, како и другите спортисти и спортски клубови кои остваруваат резултати за почит, секогаш ќе ја имаат мојата поддршка како градоначалник и на општина Неготино.