Локалната самоуправа Неготино во пресрет на одбележувањето на општинскиот празник 8-ми Ноември- Денот на ослободувањето на Неготино, како и секоја, така и оваа година ги информира сите заинтересирани правни и физички лица од општината дека до надлежната комисија за при општинскиот Совет можат да доставуваат предлози за доделување на награди и признанија по повод 8-ми Ноември. Подносителите на предлози можат да доставуваат кандидатури во 3 категории и тоа – предлог за највисоката општинска награда 8-ми Ноември за животно дело, за признанија по повод општинскиот празник, како и предлози за признанието почесен граѓанин на општина Неготино. Со предлозите потребно е да се достави и кратко образложение во писмена форма за предложените кандидати и институции , предлозите ќе бидат разгледани од страна на членовите на комисијата за награди и признанија при Советот на општината, додека конечната одлука за годинашниве добитници на наградата и признанијата по повод 8-ми ноември ја донесуваат советниците во Советот на општина Неготино. Предлозите во писмена форма можат да се доставуваат до архивата на општина Неготино најдоцна до понеделник 20-ти октомври, оваа година.

   Локалната библиотека „Страшо Пинџур“ од Неготино врз основа на предходно распишаниот конкурс, ги прогласи „најчитателите“ за лето 2014-та година. Имено, на пригодна свеченост што се одржа во читалната на библиотеката сместена во просториите на ТИЦ „Желкова куќа“, наградите и дипломите на најчитателите им го додели градоначалникот на општина Неготино Ванчо Апостолов. Така, за најчитатели од ОУ„Страшо Пинџур“ прогласени беа Симона Андоновска, Цветанка Пасинечка и Владанка Тефова, од ОУ„Гоце Делчев“ наградени беа Марија Цветкова, Андонија Кузева и Ристе Петков, најчитатели од СОУ„Св. Кирил и Методиј“ се Ана Петрова, Ружица Астарџиева и Дејан Пановски, додека во категоријата возрасни награди и дипломи добија Стефанија Симонова, Ангеле Бушевски, Богданка Арсова и Александра Балканска. Директорката на библиотеката Катерина Данаилова изрази надеж дека преку ваквите форми на стимулирање, ќе се зголеми бројот на читателите, а аналогно на тоа и бројот на изнајмени книги од неготинската библиотека која располага со навистина извонредно богат фонд на книги од сите жанрови.

   „Со ставањето во функција на реконструираниот и асфалтиран патен правец од Курија до Паликура кој се протега на подрачјето на двете општини Неготино и Росоман, го означуваме завршувањето на уште еден проект ветен од страна  на Владата на РМ и општините “ – изјави министерот за транспорт и врски Миле Јанакиески кој денеска заедно со градоначалникот на општина Неготино Ванчо Апостолов и градоначалникот на општина Росоман Стојанче Лазов на пригодна свеченост го пуштија во употреба новоизградениот пат во должина од 3 километри. Јанакиески додаде дека проектот е реализиран со средства од Владата на РМ преку Агенцијата за државни патишта во висина од 350.000 евра и со истиот патувањето од Неготино до Росоман се скратува за цели 11 километри, се обезбедува безбедно одвивање на сообраќајот, а бенефитите ќе ги почуствуваат и земјоделците кои во овој регион имаат површини и тоа во делот на транспортот на родот. Градоначалникот на општина Неготино Ванчо Апостолов рече дека изградбата на овој патен правец ќе придонесе за развој на овој претежно земјоделски регион и додаде дека на негово инсистирање работници на Гранит изведоа градежен зафат и во село Курија со тампонирање на една улица во должина од 150 метри и уредување на просторот пред селските гробишта. Градоначалникот пак на Росоман Стојанче Лазов со изградбата на патот гледа потенцијал за зголемен интерес за изгрдба на мини-винарии, бидејќи токму во непосредна близина се наоѓаат парцелите понудени на продажба за изградба на винарски визби. По завршувањето на свечената церемонија, министерот Јанакиески оствари работна средба со градоначалникот на општина Неготино Апостолов која се одржа во неговиот кабинет.