Во организација на општина Неготино и образовните установи, по повод 1-ви април Денот на шегата, како и секоја, така и оваа година се одржа традиционалната манифестација „Маскенбал-2015“ која беше проследен од огромен број посетители. Традиционалното дефиле започна од Градскиот стадион и се движеше по главната улица, по што неколку стотици дечиња под маски пристигнаа на градскиот плоштад каде што на бината се одвиваше централниот настан пропратен со богата културно-забавна програма со хумористични, забавни и денс точки. На годинашниот Маскенбал учество зедоа дечињата од двата клона на Детската градинка од Неготино, ученици од двете основни и подрачните училишта, како и ученици од СОУ„Св. Кирил и Методиј“. Посетителите на градскиот плоштад имаа можност да го проследат дефилето на децата со стотици маски, секоја изработена на свој начин и со сопствени карактеристики и пораки.

   Врз основа на остварените контакти на градоначалникот на општина Неготино Ванчо Апостолов со директорот на Агенцијата за млади и спорт на Република Македонија Марјан Спасески потврдено е дека во тековнава 2015 година во Неготино ќе бидат изградени тениски игралишта-проекти кои се дел од Програмата за работа на Владата на РМ и Програмата за работа на општина Неготино. Тениските игралишта предвидено е да се изградат во населбата Саат-кула во непосредна близина на мултинаменското игралиште и комплетно реконструираниот и обновен со нови реквизити детски забавен парк, со што граѓаните од Неготино од сите возрасти на располагање ќе добијат уште еден спортско-рекреативен  комплекс каде што во спортување, одмор и рекреација ќе можат да поминуваат дел од слободното време.

   Врз основа на Законот за комунални дејности и Програмата за комунални дејности и уредување на градежното земјиште на просторот на нашата општина, а согласно  заклучоците на Комисијата за заразни болести при Министерството за здравство, од понеделник општина Неготино ќе започне со вонредна превентивна дератизација против туларемија со која ќе бидат опфатени околу 900 ревизиони шахти и на подземниот канализациски систем со ревизионите и прифатните шахти во градот и населените места на ризични места-жаришта каде постои можност од присуство на глодари. Исто така, со оваа активност ќе бидат опфатени пропишаните заштитни зони околу каптажите и резервоарите кои служат за снабдување со вода на населението, чистење на заштитните зони околу изворните подрачја со цел заштита од контаминација од глодари, а превентивна систематска дератизација ќе се изврши и на јавно прометните површини и зеленилото, како и на депонијата Бучето. Јавните установи од општината, исто така, треба да извршат превентивна дератизација во сопствените простории. Вонредната превентивна дератизација на подрачјето на општина Неготино ќе ја вршат стручни лица од Центарот за јавно здравје од Велес и истата во целост би требало да биде реализирана во рок од 3-4 денови.

   Во рамките на програмата за култура, а по повод Светскиот ден на театарот 27 март, оваа година општина Неготино во соработка со Центарот за култура “Aцо Ѓорчев” по четврти пат ја организира прославата на овој ден, кој се слави ширум светот со изведби на голем број театарски прослави и перформанси. Во нашиот град ќе бидат одиграни две одлични театарски претстави - комедиии, во изведба на театрите од сосединте општини Демир Капија и Кавадарци.
Првата претстава со која ќе биде отворен фестивалот е урнебесната комедија “Љубовник со висок стил”, на авторот Реј Куни, а во изведба на театарот “Мирка Гинова” од Демир Капија. Под режисерската палка на Томе Атанасов, актерската група составена од вкупно 12 актери, на 25 март, среда со почеток во 20 часот на големата сцена во НУЦК “Ацо Ѓорчев” ќе ја изведат премиерата на оваа претстава пред неготинската публика.
Втората, исто така култна претстава, која претставува вистински сценски перформанс е комедијата “Сомнително лице” од српскиот автор Борислав Нушиќ. Истата е една од начесто изведуваните и најпосакуваните претстави на Балканот. Претставата ќе биде изведена од актерска група од 12 актери - членови на градскиот театар од Кавадарци. Режијата е на режисерот Диме Коцевски, а музиката на Марјан Тодоровски. Петок, 27 март, Центар за култура “Ацо Ѓорчев”, почеток 20 часот.