Со археолошки истражувања на просторот со кои треба да се утврди состојбата на темелните партии и евентуалното постоење на културни слоеви или траги на живеење од минатото, започна проектот за конзервација на Саат-кулата во Неготино. Стручната екипа која работи на терен ја сочинуваат претставници од Археолошкиот музеј на Република Македонија, од Музејот на град Неготино, а надзорот на целиот проект го врши виш конзерватор од Националниот конзерваторски центар на Македонија. Работите на овој проект ќе се одвиваат во неколку фази, а по завршувањето на истите и со конзервацијата на овој споменик на културата во нашиот град граѓаните на Неготино и потенцијалните посетители ќе добијат уште еден културно-историски објект кој со сите придружни елементи кои се предвидува да се постават околу Саат-кулата ќе претставуваат атрактивна дестинација за туристите кои ќе го посетуваат Неготино.

   По обезбедувањето на потребните финансиски средства, а согласно ветените проекти во програмата за работа на градоначалникот на општина Неготино Ванчо Апостолов, на почетокот на наредниот месец-октомври ќе започнат градежните работи за комплетна реконструкција и асвалтирање на патниот правец Горни Дисан – Вешје, проект кој ќе се реализира во три фази. Во првата фаза ( неофицијално, работите се очекува да започнат на 1-ви октомври во четврток) ќе се работи на реконструкција на 800 метри од овој патен правец за што се обезбедени средства во висина од 20.000.000 денари преку Агенцијата за финансиска поддршка на земјоделието и руралниот развој. Градоначалникот Апостолов информира дека се обезбедени и потребните средства и за останатите две фази за рекоснтрукција и асвалтирање на патот од Г.Дисан до Вешје и тоа преку проектот за меѓугранична соработка со Алмопија и проектот на ИПА преку Светска банка за поддршка на руралниот развој.

   До сите верници од муслиманска веродисповед од општина Неготино и Република Македонија честитки по повод големиот празник Курбан бајрам – ден кога верниците посветуваат соодветно внимание кон најблиските и сиромашните, испрати градоначалникот на општина Неготино Ванчо Апостолов со желби за среќни и благословени празнични денови. Курбан бајрам секогаш е повод муслиманите да извршуваат добри дела, при што традиционално и во неготинска општина се оди на посета кај најблиските роднини и пријатели при што се даваат дарови и се донира за оние кои што немаат-додава Апостолов. Градоначалникот на сите верници им посакува празникот да го поминат во пријатно и весело расположение во кругот на најблиските со искрени желби за се најдобро во иднина.

   Во согласност со годишната Програма за работа на локалната самоуправа Неготино за спроведување на општи мерки за заштита на на населението од заразни болести и оперативниот план за дезинсекција, дезинфекција и дератизација за тековнава 2015 година, се информираат граѓаните на неготинска општина дека во четврток на 24-ти септември на нашето подрачје ќе се спроведе третата по ред адултна авионска дезинсекција. Активноста и овој пат се спроведува во соработка со ресорното Министерство за здравство на Република Македонија и Центарот за јавно здравје од Велес со напомена дека авионското третирање во среда ќе се реализира во раните утрински часови и тоа во времето од 05 до 08 часот. За таа цел, а поради престојното запрашување против комарци, се информираат граѓаните и здруженијата кои одгледуваат пчели и други животни благовремено да ги преземат сите неопходни мерки за нивна заштита.

   Во организација боречкиот клуб Неготино и со финансиска поддршка од општина Неготино во нашиот град започна одржувањето на меморијалниот турнир во борење во слободен стил во чест и сеќавање на Јован Димтров-член на клубот од Неготино кој трагично го загуби животот пред 24 години. Делегации на организаторот, боречките клубови, локалната самоуправа и членови на семејството на Димитров организирано положија свежо цвеќе на неговата спомен биста со порака дека Јован нема никогаш да биде заборавен и тоа како од неговите колеги-борачи, така и од граѓаните на општина Неготино. Турнирот за отворен го прогласи градоначалникот на општина Неготино Ванчо Апостолов кој им се заблагодари на сите учесници кои учествуваат на турнирот, им посака прикажување на квалитетни  борби и да победат најдобрите. Инаку, на четвртиот по ред традиционален  турнир во борење учество зедоа 8 боречки клубови од Македонија, а борбите се одвиваат во категории за борачи до 12, 15 и 17 годишна возраст.