Благодарение на освоеното прво место од страна на учениците од пионерската екипа на ООУ„Страшо Пинџур“ на државнито квиз натпревар, оваа година токму Неготино ќе биде домаќин на Републичкиот квиз натпревар од областа на противпожарната заштита, а овој настан се предвидува да се одржи во втората половина на месец декември. Инаку, денеска во организација на општина Неготино, Територијалната противпожарна единица од градот и ООУ „Страшо Пинџур денеска во просториите на училиштето се одржа традиционалниот Општински квиз натпревар од областа на противпожарната заштита. На натпреварот во пионерска конкуренција учество зедоа 4 екипи составени од ученици од Основните училишта „Гоце Делчев“  и „Страшо Пинџур“ од Неготино, „Димката Ангелов-Габерот од Д.Капија и екипа од подрачното училиште во Долни Дисан. Во кадетска конкуренција пак се натпреваруваа 2 екипи составени од ученици од Средното општинско училиште „Св. Кирил и Методиј“ од Неготино. Сите екипи покажаа одлични резултати на тема противпожарната заштита, а градоначалникот на општина Неготино Ванчо Апостолов на најдобрите им ги врачи признанијата и наградите.

   Со тридневна програма и со спроведување на бројни настани и активности општина Неготино и оваа година на пригоден начин го прослави празникот на општината 8-ми Ноември. По повод одбележувањето на Денот на ослободувањето, градоначалникот на општина Неготино Ванчо Апостолов во својот кабинет приреди прием за претставниците на делегациите кои се присутни во нашиот град и заедно со граѓаните на Неготино го чествуваат празникот, а веднаш потоа на спомен-бистите на паднатите броци во НОБ делегациите положија свежо свеќе. Централниот настан во рамките на одбележувањето на празникот-свечената седница на Советот на општина Неготино која ја отвори претседателот Јордан Паунов се одржа во преполнетата сала на Центарот за култура во нашиот град, на која пак за реализираните активности во изминатиот едногодишен период помеѓу двата празника и проектите кои се во тек или се планирани да се спроведат пригодно обраќање имаше градоначалникот на општина Неготино Ванчо Апостолов. Во рамките на свечената седница беа доделени признанијата и наградата по повод 8-ми Ноември, а седницата заврши со културно уметничка програма.

   Синоќа (08.11.) заврши осмиот традиционален турнир во табла “Неготино 2016”, кој беше организиран во рамките на програмата за одбележување на Денот на градот – 8ми Ноември. На турнирот учество зедоа 64 учесници, кои од 6 до 8 ноември одиграа многу интересни мечеви, а најдобрите по систем на елиминација дојдоа до завршницата. Победник на турнирот е Драган Доневски единствениот таблаџија на кој по вторпат му појде од рака да го освои овој масовен турнир. За постигнатиот резултат победникот доби диплома и парична награда од 7.000 денари, додека поразениот во финалето и вицешампион на турнирот Филип Давидовиќ доби диплома и парична награда од 5.000 денари. Третопласиран на турнирот е Зоран Недев кој покрај диплома за трето место заработи и награда од 3.000 денари. Покрај наградите за најдобрите тројца учесници, беа доделени и благодарници за учество турнирот на најстарите двајца учесници.

   Она што им го ветивме на жителите на Пепелиште, го исполнивме. Новоизградениот резервор за вода со зафатнина од 250 метри кубни и потисниот цевковод во должина од 1.260 метри се веќе ставени во функција и водата од резервоарот пристигнува до домовите на месното население како во ниската, така и во високата зона. На овој начин успеавме да решиме еден децениски проблем на жителите на Пепелиште кој се однесуваше на недостигот од вода за пиење, а водата од новиот резервоар е достапна и до стопанските капацитети кои функционираат на ова подрачје.

Во текот на денот решивме уште еден горлив проблем за граѓани на Неготино кои живеат на улица која се спојува со улицата „Фемо Кулаков“. Имено, во текот на денот на задоволство на жителите кои повеќе од 30 години се соочуваа со проблеми при движењето, ја бетониравме улицата во должина од 110 метри на површина од 500 м2 и со поставување на 60 до 70 тони бетон. Станува збор за една од ретките неасфалтирани улици во градот, па сега газењето кал е минато за населението и тие пеш и со возила ќе можат да се движат по уредена и бетонирана улица.

Следејќи ја динамиката на изведување на работите, до крајот на овој месец очекуваме да заврши изградбата на двојниот тениски терен со тврда подлога кој се гради во населбата Саат-кула и со чија изградба ќе дојде до заокружување на проектот Неготино и неговите граѓани да добијат уште еден спортско-рекреативен центар. По извршеното  бетонирање на терените, поставена е ограда и столбови за осветлување за да можат терените да се користат и во ноќните часови, а во периодот пред нас се очекува финализирање на работите со поставување акрилна подлога и неопходните елементи за еден двоен тениски терен.