Претседателот Диме Витанов за во среда ,29-ти овој месец, свика одржување на редовна седница на Советот на општина Неготино која ќе започне од 18,00 часот со 18 точки на дневен ред за разгледување од страна на советниците. Меѓу другото, на дневен ред ќе се најдат повеќе предлог-програми и тоа за енергетска ефикасност, за изработка на урбанистички планови, за заштита на животната средина, за комунални дејности и уредување на градежно земјиште на просторот на општина Неготино, предлог-програмата за работа во областа на располагањето со градежно земјиште во сопственост на РМ на подрачјето на нашата општина, како и предлог-програмите за локален економски развој, за социјална заштита, образование, спорт, култура и здруженија и фондации. На дневен ред ќе се најде и предлог-оперативниот план за дејствување во зимски услови на јавни претпријатија и установи основани од општината во 2017/2018 година, како и други прашања од делокругот на работата на Советот на општина Неготино.

   Општина Неготино од  денеска започна со санирање на ударните дупки на повеќе улици во градот. Според зборовите на градоначалникот Тони Делков, приоритет на оваа активност е даден врз основа на предлозите на населението на одржаните работни средби и сознанијата од терен дека патната инфраструктура е во лоша состојба и е потребна итна интервенција во пресрет на доаѓањето на зимскиот период. Градоначалникот информираше дека санирањето на ударните дупки започна со активности на главната улица во градот „Маршал Тито“ која впрочем е и најфреквентна за сообраќај, а ќе се продолжи со санирање на дупките и на останатите улици  каде што има потреба од интервенција, а се со цел за создавање услови за нормално одвивање на сообраќајот и овозможување поголема безбедност и за возачите и пешаците Предвидено е работници на фирмата-изведувач „Изолација“ да постават 30 тони асфалт, за што општината од Буџетот ќе издвои средства во висина од 600.000 денари. Градоначалникот Делков изјави дека во тек е изготвувањето на Програмата за работа и Буџетот на општина Неготино за 2018-та година и во истите се предвидува веќе напролет да се започне со комплетна реконструкција и санација на повеќе улици во градот кај кои се регистрирани најголеми оштетувања.

   На деновиве одржаната конститутивна седница на Советот за развој на Вардарскиот регион градоначалниците од 9 општини, меѓу кои и градоначалникот на општина Неготино Тони Делков, ги поставија двата приоритети за реализација во наредниот период. Изградба на регионална фабрика за третман на цврст отпад и изградба на регионален центар за третман на бездомни кучиња се предлозите кои беа едногласно усвоени од присутните градоначалници. Тие се согласија дека пред нив е период во кој треба многу да се работи за подобрување на животот на сите граѓани, а како приоритети кои треба да се решат час поскоро се изградба на регионална фабрика за третман на цврст комунален отпад со неколку претоварни станици и решавање на проблемот со кој се соочуваат сите општини-изградба на регионален центар за третман на бездомни кучиња. Инаку, во Вардарскиот плански регион велгуваат општините Велес, Кавадарци, Неготино, Свети Николе, Лозово, Чашка, Росоман, Градско и Демир Капија.

  Посакувајќи им на сите учесници да го дадат најдоброто од себе и да остварат што е можно подобар пласман, градоначалникот на општина Неготино Тони Делков го прогласи за отворен 33-иот по ред регионален натпревар од областа на противпожарната заштита на кој учество зедоа ученици од 8 општини-Битола, Крушево, Валандово, Прилеп, Кавадарци, Гевгелија, Велес и Неготино. Самиот квиз натпревар се одржа во исклучително силна конкуренција и секој еден учесник мораше да го даде максимумот знаење и вештини за да оствари најдобар резултат. Како што беше истакнато, најдобропласираните екипи од регионалниот се стекнуваат со право  на учество на републичкиот натпревар на кој ќе се натпреваруваат најдорбите екипи од училиштата од цела Македонија. За регуларноста на натпреварувањето и за бодувањето се грижеше посебно формирана комисија составена од стручни лица од областа на противпожарната заштита. Инаку, предходно во фоајето на Центарот за култура беше отворена изложба на ликовни цртежи на тема противпожарна заштита.

  На јавниот повик за финансирање на спортските клубови од Буџетот на Општина Неготино за 2018-та година кој беше објавен минатата недела, одговорија 16 спортски колективи од општината, кои доставија план на активности и финансиска програма за наредната година. Вкупниот износ на побараните средства ќе биде дел од предлог – програмата за спорт, а по изгласувањето на истата спортските клубови од општината на почетокот на новата календарска година според точно утврдени критериуми од Советот на општината ќе добијат финансиски средства. Овие финансиски средства ќе им овозможат на спортските клубови континуирана и стабилна работа, со цел постигнување на подобри резултати и развој на спортот во Општина Неготино.