Почитувани граѓани на општина Неготино ! Би сакал од мое лично име како градоначалник на општина Неготино и од име на локалната самоуправа да Ви го честитам празникот 8-ми декември Свети Климент Охридски и да Ви посакам истиот да го поминете во пријатна домашна атмосвера. Свети Климент Охридски го славиме како македонски светец и еден од учениците на светите Кирил и Методиј кој во 886 година ја формира Охридската книжевна школа попозната како „Првиот словенски универзитет“ од кој излегле подготвени над 3.500 ученици. Исто така тој е и познат македонски и словенски учител, а Свети Климент бил и првиот Епископ Словенски со титулата Епископ Велички. Во чест на овој македонски светец го славиме и празнуваме 8-ми декември. Нека ни е за многу години празникот !

   Градоначалникот на општина Неготино Тони Делков, на нивно барање, прими и се задржа во краток разговор со претставници на фирмата „Симекс груп“ од Бурса-Република Турција на која гостите ги презентираа своите намери да инвестираат во отворање производствен погон на подрачјето на општина Неготино во кој на почетокот вработување би нашле 10-тина невработени граѓани од неготинска општина. Имено, „Симекс груп“ планира во Неготино да отвори погон во кој ќе се произведува опрема за пчеларство за што веќе ги имаат обезбедено и потребните машини за старт на производството. Градоначалникот Делков истакна дека секое едно ново вработување ќе претставува бенефит за едно семејство од нашата општина и негова и интенција на општина е да се создадат што е можно повеќе и подобри услови и други компании да покажат интерес за инвестирање во општина Неготино, отворање нови работни места и намалување на бројот на невработени. Првиот човек на општината Делков ги запозна потенцијалните инвеститори со одличната местоположба на нашиот град, како и со фактот дека општината располага со веќе подготвени градежни парцели за продажба во Индустриските зони,а гостите од Турција покажаа интерес за купување на една од споменатите градежни парцели.

   По дадената согласност од општинскиот Совет, општина Неготино преку Одделението за локален економски развој и Одделението за енергетска ефикасност ќе го имплементира проектот „Енергетска ефикасност во прекугранична област како индикативен фактор на политиката за животна средина со акроним „ЕНПОЛ-ЕЕ“ кој ќе се имплементира во рамките на ИНТЕРРЕГ ИПА програмата за прекугранична соработка Грција-Македонија 2014-2020 година. Водечки корисник на овој проект е општина Пела-Грција, општина Неготино e кориснк 2 ,корисник 3 е  Корпорација за јавен интерес за култура  и развој на општина Пела-Грција ,  СОУ„Св. Кирил и Методиј“ од нашиот град е корисник 4. Вредноста на одобрениот буџет за општина Неготино изнесува 315.797 евра или 19.432.708,50 денари со финансирање во сооднос 85 отсто Европска унија и 15 отсто национално ко-финансирање, додека вредноста на одобрениот буџет за СОУ “Св. Кирил и Методиј“ е во иснос од 86,740 евра или 5.334.540,75 денари со идентичен сооднос во делот на финансирањето. По дадената согласност следува потпишување на договорот помеѓу 4-те корисници на средствата и договорот за субвенционирање. Овој проект за подобрување на енергетската ефикасност на територијата на општина Неготино ќе се спроведува во период од  22 месеци, од денот на потпишување на Договорот за партнерство од сите четири страни и Договор за субвенционирање кој  го потпишува водечкиот корисник -општина Пела и Управувачкото тело при Министерството за економија и развој на  Република Грција.

 Советот на општина Неготино ги усвои Програмите за работа на општина Неготино за наредната 2018-та година со што се поставени основите за дејствување на  градоначалникот и локалната самоуправа за наредниот едногодишен период. Советот даде согласност за имплементирање на проектот „Енергетска ефикасност во прекугранична област како индикативен фактор на политиката за животна средина со акроним „ЕНПОЛ-ЕЕ“ кој ќе се имплементира во рамките на ИНТЕРРЕГ ИПА програмата за прекугранична соработка Грција-Република Македонија 2014-2020 година. Исто така, беа донесени Програмите за комунални дејности и уредување на градежното земјиште во нашата општина, за изработка на урбанистички планови, за локален економски развој, за енергетска ефикасност, заштита на животната средина, потоа Програмата за работа во областа на располагањето со градежно земјиште во сопственост на Република Македонија на територијата на општина Неготино, како и Програмите за социјална заштита, образование, спорт, култура, поддршка на здруженија и фондации и оперативниот план за дејствување во зимски услови на јавни претпријатија и установи основани од општината, трговски друштва и органите на општина Неготино. На седницата, беа донесени и други одлуки и решенија од делокругот на работата на Советот на општина Неготино.