Прекрасен настап на учениците од ООУ„Гоце Делчев“, избор на најубава елка во организација на градската библиотека „Страшо Пинџур“, десеттина штандови на кои се продаваа реквизити со новогодишни мотиви изработени од родителите на дечињата од детската градинка „Фемо Кулаков“, од штитениците во Дневниот центар „Порака“ и од учениците во ООУ „Гоце Делчев“- се моментите кои го одбележаа третиот и последен ден на тридневната манифестација „Новогодишна забава“ што во пресрет на дочекот на најлудата ноќ во годината општина Неготино ја организира со надлежните установи. Имено, денеска на градскиот плоштад се одржа настанот насловен како „Неготино весел бонбонград“, а атратктивната и со богати содржини исполнета програма придонесе неколку стотици граѓани од општина Неготино да излезат од своите домови и да ја проследат програмата која се одвиваше на градскиот плоштад во Неготино. Од локалната самоуправа истакнуваат дека трите дена од Новогодишната забава поминаа во одлична атмосфера и со масовно присуство на граѓаните на плоштадот, што пак ќе претставува дополнителен мотив оваа манифестација да продолжи да се одржува со надградување и на концептот и на содржините на истата, а на задоволство и на учесниците и на граѓаните на општина Неготино.

   Пријатните временски услови, богатата со содржини Програма, желбата да се проследи настапот на своите најблиски–придонесоа денеска  на градскиот плоштад во Неготино за време одржувањето на Новогодишната забава и базар да присуствуваат голем број граѓани на општината кои имаа можност да уживаат во разновидната програма подготвена од организаторите. Активностите од 3-дневната Новогодишна забава што општина Неготино ја подготви во соработка со надлежните установи започнаа со театарска претстава во изведба на ученици од ООУ „Гоце Делчев“ од нашиот град, а продолжија со настап на ученици од ООУ„Страшо Пинџур“, од СОУ„Св. Кирил и Методиј“, танцовата формација „Зиг-заг“, а денеска завршуваат со годишниот концерт на ОМУ„Владимир Арсовски“ од 19,00 часот. Манифестацијата за отворена ја прогласи градоначалникот на општина Неготино Тони Делков кој искажа јавна благодарност до сите учесници во програмата и изрази надеж дека преку содржините од истата организаторите ќе успеат да ја доловат новогодишната магија и сите присутни на плоштадот заеднички ќе споделат радосни моменти. Градоначалникот Делков на најмладите им посака многу подароци под нивната елка и исполнување на желбите, а на сите граѓани на општина Неготино многу среќа во нивните домови и уште повеќе љубов во нивните срца.

   Градоначалникот на општината Тони Делков во пресрет на Новогодишните и Божикните празници ги посети штитениците кои престојуваат во Центарот за лица со ментален хендикеп „Порака“ од Неготино. За нив локалната самоуправа обезбеди  новогодишни подароци кои  градоначалникот Делков им ги подели на штитениците кои искрено се израдуваа на вниманието и добиените новогодишни пакетчиња. Присуството на градоначалникот и претставниците на општина Неготино беше искористено штитениците од „Порака“ да се претстават со пригодна празнична програма исполнета со песни, игри и рецитации за што од страна на присутните беа наградени со бурни аплаузи, а во знак на благодарност за посетата и добиените подароци, тие на градоначалникот Делков му врачија пригоден подарок изработен од нив при спроведувањето на активностите за време на нивниот престој во дневниот центар „Порака“.

   Градоначалникот на општина Неготино Тони Делков на околу 420 дечиња кои престојуваат во двата клона „Пролет“ и „Мајски цвет“ при детската градинка „Фемо Кулаков“ од нашиот град им додели и ќе им додели новогодишни пакетчиња кои локалната самоуправа ги обезбеди во соработка со фирмата „Дуки Дасо“. Денеска (вторник) градоначалникот престојуваше во клонот „Пролет“ каде на задоволство и радост на дечињата им подели пакетчињата, а утре (среда) новогодишни пакетчиња ќе им додели и на дечињата од клонот „Мајски цвет“. Инаку, како и секоја, така и оваа година вработените во градинката за дечињата и за присутните гости подготвија и изведоа пригодна и прекрасна предновогодишна претстава , на огромна радост на дечињата кои со песна и игра и самите се вклучија во изведбата на истата. Директорката на градинката Јана Коцева и градоначалникот на општина Неготино Тони Делков ја искористија приликата на сите дечиња, нивните родители и вработените во оваа установа да им ја честитаат Новата година посакувајќи им многу здравје и среќа во 2018-та година.

   Градоначалникот на општина Неготино Тони Делков придружуван од своите соработници денеска ги посети игралните во кои престојуваат и се едуцираат дечиња од предшколска возраст во населените места Долни Дисан, Тимјаник, Црвени Брегови и Криволак, а според агендата утре ќе бидат посетени и игралните во Пепелиште, Војшанци и Тремник. Овие посети се со цел градоначалникот Делков на околу 120 дечиња кои престојуваат во 7-те игрални во селата во општината во пресрет на Новогодишните и Божикните празници да им подели новогодишни паткетчиња, да им посака да бидат добри и примерни ученици, со искрени желби за се најдобро во Новата 2018-та година за нив, за наставниците и нивните родители. Дечињата кои денеска добија новогодишни пактечиња му се заблагодарија на градоначалникот Делков за вниманието и за подароците, а неговото присуство го искористија со песнички и игри да создадат еден весел и пријатен предновогодишен амбиент.