Почитувани сограѓани ! Непобитен е фактот дека за нормално функционирање на локалната самоуправа, основа е стабилна финансиска состојба на општината. За жал, со моето стапување на функцијата градоначалник и извршените анализи од страна на стручните служби, констатиравме дека долгот на општината по разни основи изнесува вкупно 117.000.000 денари, што, верувам ќе се согласите, за една мала општина како нашата е премногу. Со гордост сакам да Ве информирам дека со транспарентно, домаќинско и одговорно мое и работење на локалната самоуправа, за само 100 дена успеавме да исплатиме достасани обврски во висина од над 27.000.000 денари со што долгот на општина Неготино го намаливме за речиси 1/3 од вкупните побарувања. Наедно, Ве информирам дека вративме и една рата од 50.000 евра долг од  кредитот за водоснабдување кој дојде за наплата, а на ЈП Комуналец му префрливме наменски 2.000.000 денари со цел вработените навремено да можат да користат здравствено осигурување. Продолжуваме и понатаму со домаќинско работење, а паралелно подготвуваме и бројни проекти за реализација, за што деновиве благовремено ќе бидете информирани преку моја прес-конференција.

  Десеттина крводарители кои во секој момент се подготвени да даруваат од скапоцената течност која спасува човечки животи заедно со раководството на неготинскиот Црвен крст, а по повод 17-ти март-Денот на крводарителството, денеска беа примени и се задржаа во краток разговор со градоначалникот на општина Неготино Тони Делков. Станува збор за дарители на крв кои досега имаат остварено 50, 75 и 100 крводарувања и имаат огромен придонес во остварувањето и надминувањето на годишните планови на Црвен крст Неготино за реализирани крводарувања, што пак Општинската организација од нашиот град ја сместува меѓу 10-те најдорби општини во Република Македонија. Претседателот Тошко Настов го запозна градоначалникот Делков дека планот за минатата година е реализиран со 128 отсто, односно наместо планираните 654, во општинскиот Црвен крст се собрани 857 крвни единици од вкупно регистрираните 1.000 крводарители од кои активни се 500. Градоначалникот Делков им честиташе на признанијата на активистите и хуманистите кои несебично даруваат крв и помагаат онаму каде истата е потребна во секое време да биде достапна , а паралелно иницираше во соработка помеѓу локалната самоуправа и Црвениот крст да се спроведе конкретен проект  за едукација на населението преку трибини, дистрибуција на флаери, едукација и слично да се подигнува свеста кај нив, особено кај младата популација за значењето на крводарувањето, бидејќи тоа е еден од начините бројот на крводарители и крводарувања во општина Неготино постојано да се зголемува. Градоначалникот Делков на лицата кои имаат дарувано крв 50, 75 и 100 пати им додели благодарници, а исто така, и Црвениот крст му врачи благодарница на Делков за поддршката што ја добиваат од него како градоначалник и од општина Неготино.

   Со почеток од 16,00 часот Советот на општина Неготино ќе ја одржи 8-та по ред седница на која на дневен ред ќе се најдат 17 точки за разгледување. Меѓу другото, советниците ќе расправаат по предлог решенијата за годишниот план за вработување на библиотеката Страшо Пинџур, основното училиште Гоце Делчев, музичкото училиште Владимир Арсовски, средното училиште Св. Кирил и Методиј и извештајот за работа на Отворениот граѓански универзитет за доживотно учење Неготино. На дневен ред ќе се најдат и предлог-одлуки од областа на урбанизмот, предлог-решенија за финансиска поддршка на клубовите и здруженијата од нашата општина, предлог-заклучокот за усвојување на извештајот за извршувањето на програмите на општината за минатата година, како и заклучокот за усвојување на годишната сметка на Буџетот на општина Неготино за 2017-та година.

  „Вие сте луѓе кои твореле во минатото и кои се уште сте активни во спроведувањето на дел од активностите кои ги организира локалната самоуправа и вие самите, како на пример „Неделата на виното“ и други настани, па токму затоа го заслужувате целосно моето и вниманието на општината“-истакна во пригодното обраќање градоначалникот на општина Неготино Тони Делков на средбата со активистките на здружението „Анри Динан“. Првиот човек на општина Неготино ја искористи оваа средба на 17 активистки да им додели пригодни подароци во знак на внимание по повод Денот на жената, притоа испраќајќи порака дека младите треба да учат и земаат пример од постарите сограѓани. Претставничките на „Анри Динан“ го запознаа градоначалникот Делков со тековните и идните планирани активности и упатија покана до него како градоначалник да присуствува на дел од проектите што ги реализираат. Исто така, пригодни подароци им беа доделени и на дел од членките на Здружението на пензионери од Неготино.

Почитувани припаднички на понежниот пол од општина Неготино ! Драги сограѓанки !  Денеска е 8-ми март, Меѓународниот ден на жените кој се празнува секоја година, па по тој повод од мое лично име како градоначалник на општина Неготино и од име на локалната самоуправа на сите припаднички на понежниот пол од нашата општина и пошироко им го честитам празникот со искрени желби за здравје, среќа и личен просперитет. Празнувањето на овој ден е и симбол на рамноправноста и слободата помеѓу двата пола. Токму затоа, Ви порачувам да бидете храбри, упорни и истрајни, полни со самодоверба и позитивни. Бидете столб на семејството и домот. Сакајте ги, почитувајте ги и честитајте им го денешниот ден на вашите најмили со што ќе им го покажете вашето внимание, а истовремено ќе им го направите денот уште поубав и повесел. Бидете здрави и живи и нека е за многу години празникот 8-ми март!