Општина Неготино започна со реализација на уште една активност од проектот „Мојот убав град“ на градоначалникот Тони Делков со која се поставија 100 метални столбчиња на потегот од Стоковната куќа до семафорите. Истите согласно пропишаните норми се поставуваат на оддалеченост од 1,30 метри, а основната цел е со столбчињата да се спречи паркирањето возила на тротоарите и да се обезбеди непречено и безбедно движење на пешаците. Стручните служби при локалната самоуправа информираат дека вакви метални столбчиња ќе бидат поставени и на самиот градски плоштад на местото на старите и оштетени од дотурот на стока од тешки товарни возила, а исто така метални столбчиња ќе бидат поставени и пред ООУ„Гоце Делчев“ во нашиот град. Инаку, со  проектот „Мојот убав град“ и спроведувањето на планираните активности. ќе се придонесе за создавање нови и поголеми зелени површини во градот, хортикултурно уредување, зголемена проодност на тротоарите, изградба на нови детски игралишта, создавање побезбеден пристап на учениците до училиштата, поплочување на помали улички со бекатон плочки, уредување на влезот и излезот од градот и многу други активности.

   Во петок, на 30ти март, во организација на Општина Неготино и воспитно-образовните установи од градот ќе се одржи традиционалниот градски маскенбал, во чии рамки ќе биде организирано маскенбалско дефиле и забвна програма на бината на градскиот плоштад со музичко-забавни изведби на децата и учениците од двете основни и средното училиште “Св.Кирил и Методиј”.
Во рамките манифестацијата “Маскенбал 2018” своите поединечни и групни маски ќе ги презентираат децата од клоновите “Мајски цвет” и “Пролет” при детската градинка “Фемо Кулаков”, учениците од основните училишта “Страшо Пинџур” и “Гоце Делчев” и средното општинско училиште “Св.Кирил и Методиј”. Манифестацијата ќе започне со маскенбалското дефиле кое ќе тргне од двете основни училишта “Гоце делчев” и “Страшо Пинџур” точно во 12.00 часот, а ќе се движи по улиците “Маршал Тито” и “Партизанска” и ќе пристигне на градскиот плоштад од двата правци, каде што од 12.30 часот ќе започне забавната програма во рамките на која децата и учениците од Неготино ќе се претстават со музички перформанси, хумористични точки и денс изведби.

   Во петок, 30ти Март, со почеток во 13 часот, во просториите на Општина Неготино ќе се одржи презентација на Проектот на УСАИД за развој на деловниот екосистем пред претставници од приватниот сектор во општината. Градоначалникот Делков ќе ја отвори средбата со поздравен говор за соработката на Општина Неготино со приватниот сектор, а потоа претставниците од Проектот ќе ги презентираат нивните активности за поддршка на микро, малите и средните претпријатија. Средбата ќе заврши соотворена дискусијата за потребите на приватниот сектор во Неготино и можностите за соработка со Проектот.
Проектот на УСАИД за развој на деловниот екосистем, започнат во ноември 2017 година,работи на зголемување на конкурентноста на микро, малите и средните претпријатија преку зајакнување на деловните услуги, финансирањето и пазарните врски. Целта на Проектот е зголемување на продуктивноста и вработувањата во приватниот сектор. Проектот, во своето четиригодишно делување, ќе се фокусира на три заемно поврзани компоненти:
1.    Подобрување на услугите на организациите за деловна поддршка на микро, малите и средните претпријатија;
2.    Подобрување на пристапот до финансии на претпријатијата;
3.    Инвестиции на водечки фирми во развој на работната сила и синџирот на снабдување.
Активностите на Проектот, како и можностите за вклучување на локалните компании, ќе бидат детално објаснети на средбата.

   Синоќа (26 март) во преполната сала на НУ Центар за култура “Ацо Ѓорчев” во Неготино актерите од кавадаречкиот театар “Иван Мазов Климе” ја одиграа урнебесната комедија “Стјуардеси” и до солзи ја насмеаа неготинската публика, во рамки на прославата на Светскиот ден на театарот 27 март. Инаку, пред одличната изведба на сцената на Центарот за култура “Ацо Ѓорчев” во Неготино, претставата „Стјуардеси“ на кавадаречкиот театар забележа осум распродадени репризи на матичната сцена во Кавадарци и повеќе успешни гостувања меѓу кои позначајни се изведбите во Гостивар и во Скопје (во Дом на АРМ).
Театарската недела во Неготино продолжува во четврток (29 март) со претставата “Бегај еве ја жена ти 2” во режија на еминентното име на македонската театарска сцена Коле Ангеловски, а во изведба на кумановскиот театар “Трајко Прокопиев”. Почетокот на претставата е закажан за во 20.00 часот, а билетите за претставата по цена од 50 денари можат да се набават на билетарата во Центарот за култура “Ацо Ѓорчев”.
Двете претстави се финансирани од општина Неготино, со цел нашиот град да биде дел од глобалната прослава на Светскиот ден на театарот, кој што оваа година масовно се одбележува насекаде во светот.

    По повод одбележувањето на Светскиот ден на театарот, со финансиска поддршка на општина Неготино, во Центарот за култура “Ацо Ѓорчев” љубителите на театарот од нашиот град следната недела ќе имаат можност да проследат две одлични театрски комедии во изведба на театрите од Кавадарци и Куманово.
Најпрво во понеделник (26 март) на сцената во Центарот за култура “Ацо Ѓорчев” ќе биде одиграна претставата “Стјуардеси” во изведба на кавадаречкиот театар. Режисер на претставата е Диме Коцевски на текст на Марк Камолети. Покрај режисерската улога, Коцевски ќе понесе и голем товар од актерски аспект, а покрај него во претставата играат уште и Видан Станоев, Валентина Ѓорѓиева, Зорица Стефковска, Ребека Малиминовска, Никола Деков и Костадин Прокопов. Урнебесната комедија на Марк Камолети е еден од најпоставуваните текстови ширум светот, а уникатното режисерско гледање на Диме Коцевски и дава една сосема нова свежина, и прави чувство дека гледате сосема различна претстава која надополнета со неочекуваните сцени, специјалните гости и тиквешкиот дијалект кој провејува низ дел од сцените, засмејува до солзи. Почетокот на претставата е закажан за во 18.30 часот, а билетите по цена од 50 денари ќе се продаваат на билетарата на Центарот за култура “Ацо Ѓорчев”.
Претставата Бегај, еве ја жена ти (Па не баш) на кумановскиот театар “Трајко Прокопиев” во режија на Коле Ангеловски, на текст на Реј Куни неготинската публика ќе може да ја проследи во четврток 29 март со почеток во 20 часот во Центарот за култура “Ацо Ѓорчев”. Во претстават играат Горан Илиќ, Дубравка Киселички, Владо Дојчиновски, Кети Дончевска Илиќ, Александра Михајловска, Илија Струмениковски и давид Илиќ. Режисерот Коле Ангеловски во својата адаптација посегнува по англискиот хумор од текстот на Куни, давајќи му домашен шмек, локална географија и дијалект и ткае возбудлива и современа приказна за луѓе од нашето секојдневие кои случајноста ги става во мноштво невозможни и урнебесни ситуации, со низа неочекувани пресврти.
Општина Неготино ги поканува сите љубители на театарот да не ја пропуштат оваа одлична можност за театарско уживање и дружење со извонредните актери од двата театри.