На пригодна свеченост во општинската сала, градоначалникот на Општина Неготино Ванчо Апостолов на членови на 21 семејство кои во месеците ноември и декември имале принова им додели ваучери во вредност од 7.000 денари врз основа на донесената одлука од страна на Советот на општината за стимулирање на наталитетот и искоренување на ,, белата чума ,, на територијата на неготинска општина. Инаку, еднократната парична помош за новородено дете се доделува по вторпат, откако предходно за време празникот на општина Неготино беа доделени ваучери за 31 новородено бебе. Имајќи предвид дека на годишно ниво на територијата на општина Неготино се раѓаат околу 200 новороденчиња, од општинскиот Буџет се предвидени средства во висина од 1,5 милион денари.