Ниту исклучително топлото време, ниту  високите температури не беа пречка голем број млади луѓе да земат активно учество, а уште поголем број посетители да ги проследат натпреварите од кошаркарскиот турнир што се одржа на градскиот плоштад во Неготино. Турнирот на кој учество зедоа екипи од неготинска општина, но и од други општини од регионот, за отворен го прогласи градоначалникот на општина Неготино Пане Трајков. Според информациите од организаторот, на турнирот учествуваа 8 екипи во машка конкуренција на возраст од 14 до 17 години, 6 екипи составени од играчи над 17 години, како и 4 женски екипи. За најуспешните, организаторите обезбедија пригодни награди кои на играчите и екипите им беа доделени по завршувањето на турнирот.