Првата ноќ од воведувањето на полицискиот час и забраната за движење во периодот од 21,00 до 06,00 часот на територијата на општина Неготино помина мирно и без никакви нарушувања на укажувањата и рестрикциите за движење во споменатиот временски период. За почитувањето на препораките се грижеа припадници на Полициската станица Неготино кои за таа цел имаа поставено два пункта со патроли на влезовите и излезите во и од Неготино, како и полицајци кои патролираа по градот за времетраењето на полицискиот час. Се апелира до населението од општина Неготино за строго почитување на забраната за движење за време на полицискиот час, а за потенцијалните прекршители се предвидени ригорозни законски мерки.

Општина Неготино упатува апел  до приватниот сектор и сите општествено одговорни граѓани од нашата општина да се вклучат со помош во обезбедување на заштитни маски и заштитни ракавици кои се неопходни за волонтерите кои се на терен и кои вршат дезинфекција на цела општина .Исто така општина Неготино упатува апел за  донирање на  производи за лична хигиена кои ќе бидат наменети за ранливите категории на граѓани. Волонтери од општина  Неготино ќе ги достават производите до нивните домови.

Волонтерски тимови од општина Неготино и понатаму остануваат во пресрет на потребите на стари и изнемоштени лица.

Во врска со ново настанатата ситуација со Kорона вирусот во нашата држава , а со цел за заштита на граѓаните од општина Неготино, упатуваме апел до  граѓани-волонтери од нашата општина да се вклучат во акцијата за дезинфекција на сите возила кои влегуваат во нашиот град. Акцијата започна да се спроведува од 21.03.2020 година (сабота) на два пункта и ќе продолжи континурано и во следниот период. Режимот  и начинот на вршење на дезинфекција на возилата ќе се врши и ќе се прилагодува согласно потребите во следниот период.

Пријавување во понеделник од 08.00-16.00 часот на мобилен  076222323 кај лицето Јордан Коцев-општина Неготино .

Дополнително по Вашето пријавување ќе бидете известени за датум и распоред на дежурство.

Однапред Ви благодариме за помошта, која во овие моменти е од огромно значење за сите !!!

  Денес заедно со претставници од ЈЗУ „ Здравствен дом “ Неготино, ОВР Неготино, претставници од Советот на општина Неготино, претставници од општинската администрација и ЈП „ Комуналец “ Неготино одржавме втор координативен состанок за преземање на активности во општина Неготино, а во рамки на препораките од Министерството за здравство за заштита и превенција од корона вирусот и се донесоа следните заклучоци:

 Изминатите денови општина Неготино подготви пропаганден материјал за заштита и превенција од корона вирусот и истиот беше соодветно поделен и закачен на повеќе локации во градот но и населените места во општина Неготино.
 Во текот на денешниот ден, општина Неготино обезбеди хуманитарна помош ( средства за лична хигиена ) за ранливите категории на граѓани од општината и истите им беа доделени. Во акцијата која денес беше спроведена во населеното место Војшанци, беа вклучени десетмина волонтери поделени во пет тимови меѓу кои беа и советниците од Советот на општина Неготино.
 Во текот на денот екипи на ЈП „ Комуналец “ Неготино, ТППЕ Неготино и волонтери од општина Неготино со своја расположлива механизација извршуваат дезинфекција на сите улици во градот со цел за поголема заштита , намалување и спречување во ширењето на корона вирусот.
 Поради состојбата и брзото ширење на вирусот од општина во општина , а со цел за заштита од истиот се преземаат превентивни мерки, односно во текот на денешниот ден се започна со акција за дезинфекција на сите возила кој ќе влезат во општина Неготино. Во оваа акција се вклучени екипи од ТППЕ Неготино, ЈП „ Комуналец “ Неготино како и волонтери од нашата општина.
ЈЗУ „ Здравствен дом “ Неготино во текот на денешниот ден доби донација на заштитни скафандери, ракавици и наочари кои во овој момент му се најпотребни. Општина Неготино е во секојдневна комуникација со ЈЗУ „ Здравствен дом “ Неготино и ОВР Неготино кои секојдневно известуваат за состојбата со граѓаните од општината кои се во самоизолација и апелираат граѓаните строго да ги почитуваат мерките и препораките од Министерството за здравство за заштита од корона вирусот.